KUCHING, 24 April: Presiden Parti Rakyat Sarawak (PRS) Datuk Joseph Salang Gandum minta lebih mayuh agi kaban ari parti nya dichiri nyadi tuai raban bansa baka Penghulu, Pemancha enggau Temenggong.
Iya madah, PRS bisi kaban ke nyadi Temenggong, lalu enti nyema iya udah enda ulih bejalaika pengawa, orang ti patut nganti penuduk iya mesti dipilih kaban ari PRS.
Ku tandu iya, pekara nya chukup beguna dikena nentuka lebih mayuh kaban PRS bejalaika tangkup pengawa nyadi tuai awak ke mantu ngatur sebarang penanggul ke bisi ngaul komuniti.
“Laban enda mayuh penyampau penuduk ke diisi kaban PRS nyadi tuai raban bansa, lebih agi Temenggong.
“Ba serata bagi menua di Sarawak PRS semina bisi siku aja sebedau tu.
“Nyadi, naka ke diatu bisi kusung ba penuduk nya lalu kitai ngarapka kaban ari PRS ulih ngisi penuduk nya,” ku iya rambau Aum Pemberita Supreme Kaunsil Parti Rayat Sarawak (PRS) ke diatur ditu, apin lama.
Nangkan ke nya, Salang madahka PRS udah bisi chalun tauka orang ke ulih diandal mangku pangku pengawa nya.
“Pekara tu udah kala dibai dalam aum sebedau tu.
“Kami mantaika enggau negika penemu kami ngambi ke terus nyadi penyereta enggau kaban kunsi ti besai reti dalam perintah sekalika perintah nengeri enggau perintah besai,” ku iya.
Berebak enggau nya, Salang madah PRS merambu deka nganjung pengari ngulu konvensyen nasional Perintah Penyerakup ti dijangka diatur ba Kuala Lumpur dalam bulan baru.
Taja pia, pemutus senentang pekara nya bedau ditetapka.
Naka ke diatu, PRS bisi lima iku pengari rayat ti nyerangkung ngarika sitak Selangau, Lubok Antu, Sri Aman, Kanowit enggau Hulu Rajang, siti parti komponen dalam Gabungan Parti Sarawak (GPS) sereta sebagi ari kaban dalam gempung Perintah Penyerakup.-TVS
