KUCHING, 23 April: Perintah Sarawak udah tu deka mantaika asil pansik bekaul enggau penatai kuasa gadung ke baru sereta pemaik iya ngagai sektor perubat.
Premier Sarawak, Datuk Patinggi Tan Sri Abang Johari Tun Openg madah, asil pansik nya deka dibantai pun bulan baru iya nya sebedau Aum Kunsil Nengeri (DUN) Sarawak ke-19 ti ditaga diatur berengkah 15 nyentuk 24 Mei.
“Pekara ke ulih dipadah aku naka tu, nitihka pansik ke digaga udah nyata dipeda pemujur datai ari nguna kuasa baru tu.
“Ba tikas dunya mega, (mayuh menua) ti deka nguna penatai kuasa tu,” ku iya.
Iya madah munyi nya ngagai media rambau Pengerami Ngelaluka Pengabang Hari raya Aidilfitri diatur iya enggau bini iya, Puan Sri Datuk Amar Juma’ani Tun Tuanku Bujang ba Palan Aum Borneo Kuching (BCCK), ditu kemari.
Abang Johari ke mega Menteri Pemansang Mengeri enggau Pengeraja Asal sereta Menteri Kuasa enggau Pemeruan Rampa Menua madah penatai kuasa gadung nya bisi kaul enggau sebansa utai tumbuh ke dikumbai lukut (alga) ke bedau kala diserungkai enggau dalam.
“Aku andal nengah pemisi pansik tu, kitai ukai semina bisi kuasa gadung ke ulih dikena baru, tang mega mantu ari sukut perubat,” ku iya.
Tandu Abang Johari, utai tumbuh nya dipelaba semina bisi ba Sarawak berindik ari pansik nya ke dipejalaika ditu.
“Nya alai, Perintah Sarawak udah nambahka penyampau saintis ba Palan Biodiversiti Sarawak (SBC).
“Tu deka nyadi peransang ngagai saintis kitai mansik bidang baru kelimpah ngemansangka teknologi baru enggau pengeraja asal ke bisi ditu,” ku iya. -TVS
