SPAOH, 16 April: Komiti Penyangga Penusah Nengeri Sarawak (SDMC) deka baum berindik ari gaya hari di menua tu ke majak angat.
Chairman SDMC ke mega Sapit Premier Sarawak, Datuk Amar Douglas Uggah Embas madah, tuju aum nya dikena berandau ke sekeda pekara bekaul enggau sebun ke dipeda bisi nyadi ba sekeda endur.
Uggah ke mega Kaban Kunsil Nengeri (ADUN) Bukit Saban madah munyi nya sepengudah ngulu Program Pejalai Ramadan diatur Kaunsil Pengibun Islam (LAKIS) Spaoh ba Masjid Darul Syifa ditu, kemari.
“Kitai di Sarawak baru udah lepas betapi enggau penusah ampuh bah tauka musin landas.
“Lalu beberapa minggu tu ke udah mega betapi enggau gaya mua hari ke majak angat sereta rangkai.
“Nyadi aum tu ila dikena SDMC ngerah semua raban ejensi ke bekaul lalu berati ke sekeda palan tauka endur ke mudah kena penusah angus ulih nyadi ngambi sida ulih nyikap tauka nyendia diri enggau tumu,” ku iya.
Nambah nya, Uggah mega ngenatai ke jaku lalau ngagai rayat anang enda seruran bejejaga lebih agi nyema bisi betunu ke utai anang enda madam ke api nya enggau manah sebedau pulai.
“Nya alai, ngagai rayat mayuh minta kita anang betunu ke ba sebarang endur lalu nyema bisi sebedau ngejang tauka mulai kediri tuku ke api nya udah dipadam enggau manah.
“Laban enti enda dirara enggau manah iya agi ulih ngerekai ke bukai lalu nyadi api besai ke tau pulai ke penusah angus nyadi nyerumba diatu benung panas lalu kayu enggau rumput pan rangkai nyamai alai api ngerekai kebukai enggau jampat,
“Nya alai, anang bela bejejaga ba jam kediatu,” ku iya.
Ba aum pemberita ke sama, Uggah mega ngelalau mensia mayuh terus nyaga pengerai diri enggau diri sebilik ari kena rampit igi penyakit Covid-19.
“Baka ke ditemu kitai kes kena rampit Covid-19 tu bisi udah niki ukai semina di Semenanjung tang menua luar.
“Tang naka jam ke diatu kitai di Sarawak agi baka selama.
“Taja rikod kitai di Sarawak manah, ukai reti nya kitai tau enda nyaga pengerai diri engga manah lebih agi bekaul enggau Covid-19 tu.
“Ambi chunto nyema bisi pengawa begelumu bebala mayuh anang enda bekenaka sengkabung mua.
“Pia mega nyema bisi berasai enda bepengerai bisi pedera renga anang laun nganjung diri beperesa ke sepital tauka klinik besemak.
“Laban diatu ukai baka suba, diatu udah bisi ubat udah bisi Vaksin.
“Nya alai, enti kitai tumu ditemu bisi kena rampit kitai ulih gerai,” ku iya.
Sama bisi datai ngulu program iya nya Kaban Parlimen Betong, Dr Richard Rapu.-TVS
