KUCHING, 14 April: Premier Sarawak Datuk Patinggi Tan Sri Abang Johari Tun Openg ngayanka ‘ulu lunga’ raban pengereja pengawa perintah deka nerima bonus tambah ujung taun tu.
Abang Johari madah tuju atur baka nya dikena mantu rayat nambahka penatai pemisi awak chukup dikena nyendiaka kereban diguna bala anak besekula.
“Ninting taun perintah Sarawak bisi meri insentif sepenyampau sebulan setengah gaji enggau ari penyampau nya kitai (perintah nengeri) deka nambahka agi bonus dikena nukar bonus ke sebedau tu diterima ninting kali Hari Raya Aidilfitri,” ku iya.
Abang Johari madah munyi nya maya Pengerami Kelai Nyerahka Bantu Raya 2023 di Wisma Bapa Malaysia ditu, sehari tu tadi.
Kenu ku Abang Johari, kabinet Sarawak mega setuju nukar insentif Raya ti deka diberi ninting ujung taun.
“Chara aku bebida dibanding enggau nengeri-nengeri bukai, lalu aku pechaya nya deka meri pemaik ngagai rayat di nengeri tu,” ku terang Abang Johari.
Berebak enggau nya, Abang Johari bisi mesan rayat bekelimat enggau belanja maya semak musin pengerami tu dikena nentuka belanja sida seruran chukup.
Sebedau tu, kena 12 April, Abang Johari madah perintah Sarawak udah ngaga pemutus enda meri bonus ngagai pengereja pengawa perintah nengeri nyerumba Hari Raya Aidilfitri serak tu.
Ku iya, pemutus nya digaga ngambika adil ngagai semua pengerami ke bisi ba nengeri tu. -TVS
