KOTA SAMARAHAN, 9 April: Mengeri Sibu iya nya entara mengeri ti nyendiaka palan bemalam ke pemadu murah di Asia, ku Dato Sri Abdul Karim Rahman Hamzah.
Iya ke mega Menteri Dagang Temuai, Industri Kreatif Enggau Seni Pemerindang Sarawak madah, pekara nya siti kelai ti manah ungkup industri dagang temuai di nengeri tu.
“Tu endang siti utai ke deka dipadah manah deka nyebut iya enda manah enda ga tang aku pechaya nengah pengawa ke digaga kitai ungkup (sektor) penerebai tama ke Sibu, lalu muka jalai raya ari Sibu ke Kapit kebendar mantu ngerichahka agi industri dagang temuai ba Sibu.
“Taja pia, aku pechaya industri dagang temuai tu tauka (sektor) hotel nya mayuh bepanggai ngagai peminta enggau pemansut nyema mayuh orang datai bilik hotel iya automatik deka niki (rega),” ku iya.
Karim ke mega Kaban Kunsil Nengeri (ADUN) Asajaya madah munyi nya rambau ngulu Program Pejalai Ramadan diatur Gerempung Pemunas Dadah Malaysia (PEMADAM) di Asajaya, kemari.
Beserimbai enggau program nya bisi 500 set bubur lambuk udah disadung ngagai sekeda komuniti ke diau ba Asajaya ditangkan pengawa nyuaka bantu ngagai raban Asnaf enggau nhyuaka pemeri Hari Raya Aidilfitri ngagai Serakup Pengintu Pendiau Dalam Komuniti PPDK.
Nangkan ke nya, Karim madah diri andal penyereta opis menteri iya dalam ngelakuka palan dagang temuai di nengeri tu nengah Sarawak Pavillion dalam program eksibisyen dagang temuai pemadu besai dunya iya nya ‘International Tourismus Borse (ITB) di Berlin empai lama ke udah deka meri empas ke positif ngagai sektor dagang temuai di sibu.
“Chara kami nesau program dikena ngelakuka pasal penau Sibu nyadi pasar enggau mengeri ke manah dilawa sekalika baka di Berlin, enti kitai ngelawa Jerman.
“Berlin kitai iya nya makit Sibu, nyadi ari penambah penatai temuai dalam menua enggau luar deka ngerichahka agi sektor dagang temuai Sibu,” ku iya.
Sebedau tu, pelantar dalam online, Agoda udah ngerintaika Sibu nyadi palan dagang temuai ke pemadu murah di Malaysia.-TVS
