SARATOK, 7 April: Opis Kaunsil Pelilih Saratok (MDS) disaran belajar sereta bechuan ke pemujur dijapai Opis Kaunsil Pelilih Marudi (MDM) nyema deka jelai berita baka opis kaunsil ba pelilih bukai di Sarawak.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madah, kebendar MDS ba penuduk pemadu baruh entara semua opis kaunsil pelilih serata Sarawak.
Nya alai, iya ngelalau MDS patut berati ke pekara nya lalu meransang sida patut ngambi MDM nyadika chuan dititih dikena nyapai penyulut dudi hari.
“Munyi dipadah aku tadi Kaunsil Pelilih Saratok (MDS) enti ba renggat nengeri ba penuduk pemadu baruh sekali.
“Nyadi, aku arapka bala kaban kaunsil betuai ke Pegawai Opis Pelilih empu enggau dibantu bala pengari rayat bisi ditu ulih ngadu ke mayuh agi pemansang enggau perengkaguna di Saratok lebih manah agi awakka sebaka singkang pemansang baka pelilih menua ke bukai,” ku iya.
Iya mansutka penemu nya maya pengudah tembu pengawa nyain setipikit enggau ngemata ke pengawa Angkat Sumpah nyadi kaunselor Opis Kaunsil Pelilih Saratok (MDS) ba Bilik Aum Librari Opis Kaunsil Pelilih Saratok ditu, kemari.
Nangkan ke nya, ku Penguang meransang bala kaban MDS ke udah dipilih mangku pengawa nyadi kaunselor nadai pengawa enda ulih dikereja nyema bisi kerejasama rat enggau pangan diri.
“Ba aku nadai utai enda alah, ambika chunto baka Marudi iya nya Opis Kaunsil Pelilih Marudi kala bulih (anugerah) lima bintang.
“Kebendar jarang kitai ulih meda tauka nemu opis kaunsil pelilih mit bulih lima bintang lalu Marudi siti ari nya.
“Nya alai, enti kitai tu ulih bekerejasama bepikir di luar pengulih kitai baka ngena aplikasuen ke suah diguna Opis Kaunsil Mengeri Besai pan ulih diadu kitai ba ikas kaunsil pelilih,” ku iya.
Berebak enggau nya, Penguang ngarapka raban kaunselor MDS ke baru dichiri ulih mandangka rikod pengawa ti manah.
“Nyadi aku arap ke raban kaunselor ke baru tu tadi ulih meri penemu ti badas lalu enti sida tu deka nemu baka ni chara orang menua bukai ngadu ke utai baka nya sida ulih belajar ngagai kaunsil pelilih bukai ke manah agi rikod ngereja pengawa,” ku iya.
Ke penerang, pengawa angkat sumpah nyadi kaunselor nya mujur dipenyadika Datuk Dr Penguang Manggil empu.
Bisi 31 iku kaunselor udah angkat sumpah rambau pengawa nya lalu ari semua penyampau nya, 21 iku kaunselor baru.
Parti Pesaka Bumiputera Bersatu (PBB) mengkang ngembuan penyampau kaban parti dichiri nyadi kaunselor pemadu mayuh iya nya 15 iku ditangkan lapan ari Parti Progresif Demokratik (PDP), lima iku ari Parti Rakyat Sarawak (PRS) enggau tiga iku ari Parti Sa’ati Rayat Sarawak (SUPP).
Nangkan ke nya, Pegawai MDS Saratok, Haron Mahidi agi dichiri nampung pengawa nyadi Chairman MDS ungkup penggal ti kedua.-TVS
