SARATOK, 7 April: Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madah, elaun raban kaunselor ti nyadi kaban Opis Kaunsil Pelilih patut diserenih baru ngambika setipak enggau pemerat tanggungpengawa ke dikereja sida.
Ku iya, elaun kaunselor ba jam diatu kelalu mit enti dibanding enggau penyampau elaun ke diberi ngagai bala tuai raban bansa baka penghulu enggau tuai rumah.
“Baka nya mega ba tanggungpengawa sida kaunselor asai aku pan patut diperati baru laban gaji minimum diatu abis nadai RM1,500 nyadi pekara tu patut dipeda baru awakka sida tu ulih nerima elaun ke tinggi agi ari penghulu enggau tuai rumah,” ku iya.
Iya mansutka penemu nya maya pengudah tembu pengawa nyain setipikit enggau ngemata ke pengawa Angkat Sumpah nyadi kaunselor Opis Kaunsil Pelilih Saratok (MDS) ba Bilik Aum Librari Opis Kaunsil Pelilih Saratok ditu, kemari.
Nangkan ke nya, Penguang ke mega Kaban Kunsil Nengeri (ADUN) Marudi madah raban kaunselor patut nerima elaun setipak enggau tanggungpengawa laban utai ke dikereja bala kaunselor jam ke diatu jauh bida enggau ke dulu suba.
“Nyadi pekara nya patut dibayar nitihka pematut laban diatu pengawa bala kaunselor ti nyadi kaban opis kaunsil pelilih mayuh pemar seriran enggau tangkup peminta rayat.
“Kitai bela nemu enti ba mengeri sida gawa sigi 24 jam laban lumur telepon sida tu tadi endang diberi ngagai mensia mayuh awak ke enti bisi sebarang pekara nyadi nyamai endur betanya ngagai sida (kaunselor).
Ke penerang, bisi 31 iku kaban MDS udah mujur angkat sumpat dipadu nyadi kaunselor ungkup timpuh dua taun tauka sepenggal berengkah 1 April 2023 nyentuk 31 March 2025.
Ari penyampau nya, 21 iku ari kaunselor baru MDS terubah iya dichiri nyadi kaunselor lalu semina 10 iku aja kaban MDS ke lama agi dipilih neruska servis sida.
Sama bisi datai ngemataka pengawa tu, ADUN Krian Friday Belik, ADUN Kabong Mohd Chee Kadir ADUN Kalaka, Mohd Duri enggau ke bukai. – TVS
