KUCHING, 6 April: Nama Ibu Ida Dayak ti mujur ngeraika mayuh pesakit tekala nya bekaul enggau penanggul tulang ngena chara tradisional majak beberita ba raban penguna media rama ukai semina di Indonesia tang mega ditemu menua bukai nyengkaum Malaysia.
Ida Dayak, 51 iya nya siku indu ari menua Kalimantan Timur (KALTIM), Indonesia ngembuan penau ngeraika orang ke timpang jari, kaki enggau lengan kenyau ari ada nyengkaum orang ke kala patah tulang, tepelasuk, bajung enggau strok semina ngena minyak urut ke dikumbai minyak bintang.
Chara Ida Dayak merubat orang sakit suah dirakam dalam akaun TikTok iya empu@idadayak7 tauka akaun Youtube Petualang Ibu Dayak.
Ida Dayak dipeda semina nata enggau ngunsut minyak nya ba lengan, pala patung tauka kaki orang ke sakit lalu sida ke sakit dipeda terus gerai tekala nya.
Ketegal penyiru deka mantu mensia mayuh, Ida Dayak nadai ngeletak sebarang bayar ngagai orang ke udah diperubat tang pesakit semina diperansang meli minyak bintang ke udah digaga iya.
Video ke dirakam maya Ida Dayak merubat pesakit dipeda bejuta iku orang, lalu penatai orang ti ngemataka iya merubat pesakit ba sesebengkah endur seruran dedat laban tugung mensia ti deka meda enggau lebih semak chara iya merubat pesakit kelimpah ti nganjung diri empu berubat.
Pekara ke nyata, manang Ida Dayak tauka nama amat iya Ida Andriyani tu seruran dipeda ngena ngepan asal bansa Dayak seraya betanda lebuh ngubat pesakit.
Lebuh beratika ruang komen akaun TikTok iya, tebal agi rayat Indonesia seruran nganti penatai ibu ke chukup tebilang tu datai ngagai menua sida.-TVS
