KUCHING, 6 April: Bala pemekit Dara Kenyalang dalam episod tujuh bisi diajar enggau penemu ke chukup beguna iya nya senentang chara nyadi orang dagang.
Nengah chara beraban sida dipinta ngaga video iklan ti mantaika produk ke dikeluarka siku pedagang indu ti udah jelai nama ba nengeri tu ke ngasilka produk pemakai enggau penganta nguna lada.
Tetiap raban ke udah dipilih dipinta ngerikod enggau ngedit video iklan nitihka kreativiti enggau langgur penemu sida empu, lalu timpuh diberi semina dua jam.
Ku Steffy Sharon madah nengah peluang nya iya belajar chara ngaduka pengawa chara beraban enggau ngaga pemutus ke nemban.
“Kami diuji ngaga video iklan pengelama 40 sikin. Pengawa tu bisi pemar laban kitai ngaduka pengawa beraban. Lebih agi, tetiap iku ari kitai bisi langgur penemu ti bebida.
“Chara gawa beraban tu bisi tusah mimit lebuh kitai dipinta masukka semua produk dalam video iklan pengelama 40 sikin aja,” ku iya madah.
Nangkan ke nya, Tonnia Kisi madahka iya bisi peneleba bedajaka produk sebedau tu, lalu nengah awak nya iya bekunsika penemu ngagai raban pemekit ke bukai.
“Nyadi aku bekunsika peneleba ngagai bakih aku senentang chara ke ulih dikena bedajaka produk ngambika orang luar tauka mensia mayuh deka meli produk ti didajaka nya,” ku iya madah.
Nangkan ke nya, Lofrenska Fezzie nerangka nengah peluang nya, iya belajar nepu eleman komedi ba dalam video iklan ngambi ke narit ati orang lebuh meda iklan produk nya.
“Kami bisi nepu elemen komedi ba dalam video iklan. Iklan ti ulih mesti bisi penerang ke silik, enda kelalu formal sereta mantaika penerang siti-siti produk ti mudah dipereti ke orang,” ku iya madah.
Mayuh macham pemar, penguji sereta peneleba baru ti dipelajar sida sekumbang dipinta ngaga video iklan ke enda kala dikereja sida ngelama tu.
Nitihka rikod, dalam episode keenam, bala pemekit Dara Kenyalang diberi peluang seraya diuji nebah kereban muzik asal Dayak.
Nyadi, anang enda ingat meda program Dara Kenyalang, program ti ngempuru pemekit indu dara dayak ti ngambi konsep pekit Kumang Iban , Keligit Orang Ulu enggau Dayung Sangon.
Program Dara Kenyalang ulih dipeda kita ninting Hari Minggu, pukul tiga lemai semina ba TVS, Channel 122, Astro enggau MYTV.
Sapa kini indu dara ti dipilih nyadi pemenang Dara Kenyalang musin keterubah tu?
Sapa kini dibuai enggau ke terus beretan nyingkang ke episode bukai udah tu?
Penerang enggau info pemadu baru senentang program Dara Kenyalang tau dipeda kita ba semua pelantar media rama TVS. – TVS
