KUCHING, 3 April: Tangkup pengawa nyadi penengkebang leka lagu ukai pekara ke mudah dikereja.
Pengawa baka tu ukai semina begunaka orang ti kreatif tang ngembuan pengelandik nusun leka lagu ngambi ke beriran tusun leka jaku lalu nyamai didinga mensia mayuh.
Siku penengkebang leka lagu Iban, Cecelia Leja, 30, madahka pengelandik ti dikembuan iya ba main asal baka bejawang, ai ansah, nimang, pemuka kota, jaku dalam dipasukka ke iya dalam semua lagu ti ditengkebang ngambi ke lagu nya bisi reti lalu ngundan jaku ajar ngagai peninga.
Cecelia asal ari rumah Embading Sungai Bakas Sibuti, Miri endang ngemeratka leka lagu ti ngundan cherita nyata ba pengidup lalu masukka leka main asal ngambika lagu nya idup seraya manah didinga.
Nya kebuah, lagu ti diasil ke iya bebida ari orang bukai enggau tuju deka ngetanka leka main asal bansa diri nengah dunya pemerindang.
“Ba tetiap lagu ke digaga aku endang ngemeratka jaku Iban dalam baka nyelitka leka jaku nimang, ai ansah, bejawang enggau pemuka kota.
“Laban diatu leka main asal jarang amat didinga. Ari nya nembiak rebak baru ulih nemu sereta belajar ke jaku Iban kitai,”ku iya rambau dirandau pemberita TVS ba Studio Aka Dambai Production di Kuching, empai lama.
Ku iya, industri muzik Dayak diatu udah jauh mansang enti dibanding enggau suba laban mayuh pelasar bisi disediaka endur mantaika pengelandik ba dunya pemerindang sekali ba ba pengawa nengkebang lagu, penanyi, komposer enggau ke bukai.
Ngelansa pasal kisah pengidup ba dunya pemerindang, Cecelia madah, iya endang ngembuan pengerindu nengkebang lagu kenyau ari iya besekula suba sebedau nyadi tulang belakang penengkebang leka lagu ba baruh perabung sebuah serikat produksi Dayak ke tebilang iya nya Aka Dambai Production (ADP).
“Aku berengkah nulis lagu tu ari taun 2019 maya aku agi besekula suba, tang maya nya nadai ngelala orang, ba dini endur patut nyuaka lirik lagu.
“Pengudah bisi produksi (Aka Dambai Production) baka tu, aku ulih mantaika pengelandik aku dalam pengawa nengkebang lirik lagu ukai semina dibantai ba media rama aja baka ke ngelama tu,” ku iya.
Berindik ari nya, iya meransang rebak baru berani ngambi peluang mantaika pengelandik sida ba dunya pemerindang laban pengawa nyadi tengkebang lagu mega siti kerjaya ti manah.
Ku iya, beguna bendar ngembuan pengelandik ba main asal sereta kreatif dalam nengkebang lagu Iban ti bekualiti dikena nangkup peminta makit industri muzik nitihka singkang pemansang jeman diatu.
“Peransang aku, anang malu mantaika pengelandik diri laban diatu mayuh pelantar endur kitai nganjung lirik lagu ngambi ke industri muzik kitai majak maju enggau asil bala rebak baru diatu.
Kelimpah ari landik ba nengkebang lagu iban, Cecelia mega siku orang ti nemu ba pengawa begagaka kuih, kek sereta nyambil nyadi model bakat ungkup pengawa photoshot bala photographer di pelilih Sarikei.-TVS
