JULAU, 2 April: Raban ari Opis Kereja Raya (JKR) Sarikei udah bejalai atur ngantap kandang tanah tekerap di Jalai Merurun ditu ngena kimbis dikena nagang tanah ari majak tusur.
Taja pia, mensia mayuh lebih agi penguna ke suah betengahka Jalai Merurun ke Pasar Julau dilalau terus bejimat lebuh mansa kandang jalai ke bisi tekerap nya lebih agi maya malam hari seraya nganti jalai nya diteriki lebih meruan.
Sebedau tu, Balai Bomba enggau Penyah Penusah (BBP) Bintangor nengah sebengkah penerang madahka, tanah tekerap nya diripotka nyadi urung pukul 9.50 pagi kemari.
Maya ngabas nya kemari, raban BBP Bintangor semina matau enggau masang pelepa ngambika mensia mayuh ngadang lebuh tepedaka pelepa ke dipasang ba kandang endur tanah ke tekerap nya.
Endur penyadi tanah tekerap nya ari BBP Bintangor urung 71 kilometer.
“Mensia mayuh dipinta lengkas ngaga ripot nyema bisi bekau baru ba tanah ke tekerap nya,” ku tandu penerang nya.
Operasyen ngabas palan tanah ke tekerap nya kemari betuaika Pegawai Bomba Kanan II, Adam anak Gauk.
Pengudah nentuka palan nya likun, raban BBP Bintangor mupuk pulai baru ngagai balai.-TVS
