BETONG, 27 Mac: Pengawa ngemujurka Projek Padang Bilun Nenasan Pandak (STOLport) Bebuling Spaoh diatu bejalai lanchar, taja projek ke sama di Bukit Mabong agi ditangguh.
Sapit Premier Sarawak, Datuk Amar Douglas Uggah Embas madahka, iya tepantup ati meda pemansang Projek STOLport Bebuling pengudah sekeda ari endur nya udah disemin.
Pia mega, nenasan nya udah dikemanah ari 750 meter ngagai 1.2 kilometer.
“Aku mega udah ngabas pemansang projek STOLport Bebuling.
“Sebedau tu kitai semina ngaga 750 meter lalu diatu udah dikemanah nyadi 1.2 kilometer. Projek tu beungkus RM296 juta,”ku iya.
Iya madahka, projek nya ti beungkus RM296 juta nya ditaga tembu bulan Januari 2024.
Iya mansutka jaku nya rambau dirandau pemberita maya nurun ngabas sekeda projek pemansang di Bagi Menua Betong kena ke Hari Enam.
Uggah nerangka, kunteriktor ke ngaga STOLport Bebuling mega ngaga Jematan Spaoh.
Uggah pechaya kunteriktor baru ulih neruska projek ti beungkus RM36.9 juta nya nitihka timpuh ke udah ditaga.
“Nyadi aku ngarapka pengudah gaya hari udah tu ila majak manah, kitai ngelalau kunteriktor nguna peluang nya.
“Pia mega projek jematan. Kitai ngarapka gaya hari ke majak manah ulih mantu sida neruska pengawa ngaga projek.
“Penyampau pengereja pengawa mega chukup,”ku iya.
Nangkan ke nya, iya meri jamin senentang Opis Menteri Infrastruktur Enggau Pemansang Penyangkai Kapal (MIPD) enggau Opis Kereja Raya JKR) nengeri deka terus matau pemansang semua projek di serata nengeri tu.
Enti nyema bisi kunteriktor ke enda mujur bejalaika pengawa, opis menteri deka mutarka pekara nya nengah chara ke patut.
MIPD enggau JKR nengeri bisi netapka standard ke mesti dititihka raban kunteriktor ngambi ke kunterik sida enda diketuka.
Bekaul enggau Projek STOLport Bukit Mabong, Uggah ke mega Menteri Infrastruktur Enggau Pemansang Penyangkai Kapal nerangka, kabinet rambau aum komiti ngemataka pemansang nengeri di Kapit empai lama udah ngaga pemutus nangguh projek ti beungkus RM193 juta nya naka ke diatu.
Ku iya madah, strategi dikena ngemujurka projek nya mesti nyendiaka semua perengkaguna nya dulu.
Iya mega madahka, ba baruh Opis Pelilih Bukit Mabong, bisi sekeda projek baka opis pelilih baru, rumah pekereja perintah, tang endur nya apin bisi bekal ai enggau karan.-TVS
