KUCHING, 26 Mac: Kaban Kunsil Nengeri (ADUN) Tarat, Datuk Roland Sagah Wee Inn nerima manah perambu ngaga sebuah kasino di nengeri tu.
Taja pia, ku iya nyema perambu nya dikemujur, perintah patut netapka garis lalau ke patut dititih pengempu kasino.
“Nya alai, nadai salah kitai deka numbuhka kasino ditu. Tang nya patut ngembuan garis lalau dikena nyaga industri judi ba nengeri tu.
“Berebak enggau nya mega, laban nya siti ari chara dikena matak pemeranak puku luar ba sektor tu.
“Sida ke enda nemu bejudi tauka enda dikemendarka bejudi, anang bejudi.
“Kitai diau ba dunya ke bisi lebas… Tang sida ke ngembuan mayuh wang dikena bejudi, teruska aja,”ku iya.
Iya madah munyi nya pengudah bejadika Simposium Graduet Gerempung Bansa Dayak Bidayuh (DBNA) enggau Gerempung Graduet Bidayuh (BGA), ke diatur ditu, kemari.
Tandu Roland, perambu ngaga sebuah kasino nya ulih ngerichahka agi sektor ekonomi lebih agi industri dagang temuai.
“Aku nyukung lalu setuju enggau buah penemu numbuhka kasino di Borneo Highland Resort laban nya ulih mantu ngerichahka agi ekonomi lebih agi industri dagang temuai nengah utai ke didinga aku ari bala bakih ba Gerempung Bansa Dayak Bidayuh (DBNA) enggau Gerempung Graduet Bidayuh (BGA), lalu penemu tu diterima manah,” ku iya. – TVS
