KUCHING, 24 Mac: Atur ngubah takwim sekula patut disetuju semua raban ngambika nadai agi didinga sebana enggau jaku pejah ke disema baka ‘Rumah Siap Pahat Masih Berbunyi’.
Pia ku, Presiden Serakup Pengajar Sarawak (STU) Kullin Djayang meri timbal bekaul enggau atur Opis Menteri Pelajar Malaysia ti deka takwim sekula pulai baru baka selama iya nya berengkah Januari.
“STU kebendar endang setuju tang pekara nya patut diperati enggau silik ari sukut ngambika nadai raban sebana tauka enda lantang ati.
“Kitai enggai agi ninga sebana tauka pejah munyiku sempama (Melayu) ‘Rumah Siap Pahat Masih Berbunyi’,” ku iya madah nengah sebengkah penerang sehari tu.
Nangkan ke nya, Kullin madah sebana apai indai, nembiak sekula, pengajar enggau mensia mayuh ukai nyadika dalih ke tegap laban semua pekara ke baru sigi tusah deka dititih tekala nya.
“Pekara nya beguna awak endur neleba ke diri.
“Kelimpah ari sebana semua raban, pekara bekaul enggau penusah enda disadang mega patut diperunding.
“Baka ke nyadi sebedau tu, mayuh penusah enda disadang nyadi lebih agi dalam bulan Januari nyentuk March mayuh kandang endur ba serata menua dituntung penusah ampuh bah,” ku iya.
Nya alai, beratika pekara nya STU ngasaika KPM patut berandau enggau semua raban baka raban pemesai ari genap Opis Pelajar Nengeri (JPN), Opis Pelajar Pelilih (PPD), prinsipal, kepala pengajar enggau pengari apai indai nengah Gerempung Apai Indai enggau Pengajar (PIBG) awakka perambu silik nuju ubah nya bela disetuju.
Kelimpah ari nya, Kullin madah randau nya patut mai semua ketuai gerempung pengajar ba serata menua.
“Semua kaban gerempung pengajar bela kena empas enggau ubah tu. Kitai nangi senentang ubah maya kemisi sekula, kemisi pengerami enggau sekula ganti ke dilanggur KPM.
“Nyadi ubah tu begunaka timbal penemu ari semua raban nyengkaum bala pengajar enggau nembiak,” ku iya.
Berebak enggau nya, STU ngarapka KPM ngaga atur ke pemadu manah lalu ngira penemu semua raban dalam mulaika baru takwim sekula baka suba.
Ke penemu, kena 22 March tu tadi KPM nengah Menteri iya, Fadhlina Sidek bisi mansutka penerang madahka opis menteri nya dalam perambu mulaika baru takwim sesi sekula ngagai Januari laban mesti nitihka Akta Pendidikan ti deka nembiak sekula mesti besekula abis nadai 190 hari.-TVS
