KUCHING, 24 Mac: Komitmen perintah Sarawak ti ngemeratka ekonomi gadung enggau kuasa ulih dikemaru mandangka perintah menatika pemeruan enggau pemeresi rampa menua.
Dekan Fakulti Sains Sosial dan Kemanusiaan, Universiti Malaysia Sarawak (UNIMAS) Profesor Dr Neilson Ilan Mersat madahka nya entara polisi perintah Sarawak dalam ngemansangka nengeri tu awak ke rebak dudi ulih ngasaika penguntung ari pemanah rampa menua taja pan dunya nyau majak moden.
“Nyadi nya mandangka perintah kitai tetap menatika pemeruan rampa menua seraya neruska pemansang ti tau nguntungka rayat.
“Enti kitai beratika kuasa ulih dikemaru baka hidrogen, solar enggau angin ke ukai semina dikemansangka ba menua tu, tang mega udah lama dikena ba menua bukai ke dulu maju,” ku iya madah.
Dr Neilson nerangka Sarawak ti ba baruh iring Premier, Datuk Patinggi Tan Sri Abang Johari Tun Openg semampai nengkira diri bekunsi peneleba enggau menua bukai bekaul pengawa ngasilka kuasa ulih dikemaru seraya meransang pengerembai ekonomi.
“Kitai mega bisi ninga senentang pengawa dagang karbon ke mega entara pekara ti mantu ngemeranka pemeruan rampa menua di Malaysia enggau dunya.
“Taja pan kitai beguna ke pemansang dalam mayuh macham sukut, pemereti senentang guna ngintu rampa menua mega anang enda dikenatika,” tandu iya.
Dr Neilson mansutka jaku nya ngagai pemberita TVS lebuh Hari Empat.
Nitihka rikod, Sarawak ngembuan peneleba ngemansangka tiga buah projek hidroelekterik ba Batang Ai, di Sri Aman, Bakun enggau Murum dikena mantu menua bukai bulih kuasa karan.
Kelimpah ari nya, Sarawak mega udah nyendiaka kuasa karan ngagai Kalimantan Barat lalu ditangkan ke Sabah sereta Brunei.
Sebedau tu, Premier Sarawak bisi nemuai ke Malinau di Kalimantan Utara, Indonesia berindik ari dikangau serikat ke diempu pemeranak puku ari Indonesia, PT Kayan Hydropower Nusantara (PTKHN).
PTKHN deka ngemansangka stesyen mekal kuasa hidroelektrik pemadu besai di Indonesia ti bepalan ba Sungai Mentarang, kira-kira 35 kilometer ari Malinau. – TVS
