SERIAN, 24 Mac: Hari keterubah bazar ramadan Serian mandangka mensia mayuh besun-sun ngulu bansal bejual pemakai nyengkaum raban ukai Islam ti bela gagit milih pemakai ke bisi dinah ba bazar nya.
Kaban Kunsil Nengeri (ADUN) Bukit Semuja, John Ilus madah, bazar ramadan nya ukai semina nyadi pelasar endur nambahka penatai pemisi, tang mega nyadi pelasar ngempuruka rayat ari bemacham jalai pengarap enggau bansa di Serian.
“Tu mih pengelebih bala kitai Serian tu enda ngira bansa pengarap kitai seruran bekerejasama enda ngira sebarang pengerami nyadi kitai ngelaluka sukung semua raban sekalika ari bansa bukai ngambi bagi ba sebarang aja program lebih agi nengah program ke bisi diatur serak tu,” ku iya.
John madah munyi nya pengudah Bejadika Bazar Ramadan Serian 2023 ti dibuka ba taba baru Serian Commercial Centre tisi Jalai Serian By-Pass, kemari.
Nangka ke nya, John madah pemanah kaul enggau penyerakup ke dijapai tu udah lama dikemeranka komuniti di Serian enda ngira penatai asal sida.
Pia mega, ku iya nengah kerejasama nya, nyungkak semangat solidariti semua bansa.
“Tu kebendar udah dikemeranka ngelama di Serian, laban kitai nadai ngasaika bida nuan enggau aku lalu kami ngumbai diri kami Serian.
“Kami enda nyebut aku. Tu mih kitai, bida ke berupai dipeda ba kitai Serian enda ngira sapa laban kitai bejakuka pasal solidariti enggau kerejasama dalam siti raban.
“Aku chukup temegah enggau ulah sereta kerejasama komuniti kitai di Serian tu,” ku iya.
Ke penemu, lebih 70 bansal pemakai bisi dibuka ba bazar ramadan nya diatur nengah kerejasama Opis Pelilih Serian (MDS) enggau Kaunsil Pengibun Pengelantang Islam Serian (LAKIS) dibuka berengkah pukul 12 tengah hari nyentuk 10 malam sepanjai bulan puasa.-TVS
