KUCHING, 24 Mac: Industri keresa rumah terus nyadi entara sektor ke beguna dalam pemansang ekonomi di Sarawak.
Penyampau asil ekspot industri keresa rumah di Sarawak ditaga ulih mansutka asil ngelui RM4 bilion manggai taun 2030.
Gerempung Pemansang Industri Kayu Ramu Sarawak (PUSAKA) madahka dikena nentuka sektor nya terus meri penguntung, dia perintah sarawak deka nempa pedagang keresa rumah biak profesional nengah program pemansang pedagang biak.
PUSAKA nerangka industri keresa rumah entara sektor ekonomi ti dikemeratka ba baruh Strategi Pemansang Pasca COVID-19 (PCDS) 2030 sereta bisi daya ngemudi Sarawak nyadi nengeri maju sereta bepenatai pemisi tinggi.
“Mayuh bengkah inisiatif udah dipejalaika baka program pemansang pengawa dagang mit enggau sedang (PKS) dikena nempa pedagang ke ulih besemekih ba renggat dunya,” ku iya madah.
Nangkan ke nya, PUSAKA madahka mayuh bengkah inisiatif udah dipejalaika baka program Pemansang Pengawa Dagang Mit enggau Sedang (PKS) enggau pedagang biak dikena nentuka pedagang keresa rumah ulih besemekih sereta ba ikas antarabansa.
“Program pemansang PKS nyaran deka nempa 200 PKS enggau 65 vendor keresa rumah manggai taun 2030.
“Pia mega deka mantu urung 300 PKS enggau lima vendor Bumiputera rembus ke makit global.
“Pengawa ngaga keresa rumah entara subsektor ti pemadu jampat mansang dalam industri ke nguna kayu ramu di Malaysia,” tandu iya.
Udah nya, PUSAKA madahka taman perabot di Kuching enggau Tanjung Manis mega bisi potensi ngulihka asil meranak puku penyampau RM500,000 dijangka digaga nengah kerejasama semua pemekuh industri dudi hari.
Sebuah makmal keresa rumah benung digaga ba Kota Samarahan dikena nyendiaka servis ngagai pengeluar ari menua tu seraya nentuka sida nitihka standard makit global sekalika dijual dalam menua tauka ekspot. – TVS
