KUCHING, 23 Mac: Sarawak dibungkur 7.65 juta hektar kampung tauka 61.4 peratus ari buka pengeluas tanah Sarawak, ku Direktor Opis Kampung Sarawak, Datu Hamden Mohammad.
Tu diaku Ripot Tuai Audit Menua 2021 Siri 2 ti bepejuluk ‘Auditan Khas Pengurusan Hutan dan Impak kepada Alam Sekitar, Aktiviti Kementerian/ Agensi dan Pengauditan Pematuhan Kementerian / Agensi Negeri’ ti dichelak kena 6 Januari 2023.
Ku iya, ripot nya nyimpulka kampung ba Sarawak udah diadu enggau meruan sereta meri pemaik ngagai sosioekonomi enggau ngetanka pemeruan rampa menua.
“Pemeruan rampa menua nyadi agenda besai dalam Strategi Pemansang Pasca Covid-19 2030 (PCDS 2030) mai Sarawak nyingkang nuju menua mansang manggai taun 2030,” ku iya nengah sebengkah penerang, kemari.
Tu beduduk ari penerang ari sekeda raban madahka Sarawak deka lenyau lebih mayuh kandang kampung.
Iya nyemetak madah, penerang nya kebendar bepelasarka peragam ngagai trend kemaya hari senentang pengawa ngusi tanah ungkup pemansang.
“Kitai enda mantah Sarawak endang benung mansang nuju status menua manju manggai taun 2030.
“Endang bisi kandang tanah ke dikupas ungkup tuju pemansang bemacham sektor baka betanam betupi, muka mengeri enggau endur berumah, industri enggau ke bukai,” ku iya.
Tandu iya, Sarawak bebendar ngimbang pemansang tu nengah pemeruan rampa menua, lebih agi dalam ngetanka pemeruan kandang kampung.
‘Sarawak Land Use Policy 2012’ udah ngentapka tujuh juta hektar ungkup tuju nguna tanah kampung iya nya kampung galau mendam (enam juta hektar) enggau ungkup tuju Sitak Dijaga Penuh (sejuta hektar).
Entara program ke diatur dikena nentuka pengawa ngintu enggau rehabilitasyen kampung tu iya nya:
Program nanam paung kayu chara besai ba selampur Sarawak, dikumbai ‘Greening Sarawak Campaign’ enggau Malaysia gadung.
Ngurangka tikas nebang kayu kampung ngena chara nebang kayu ti kurang meri empas (RIL – Reduce Impact Logging).
Pengawa meri lisin nebang kayu mega mesti digaga ungkup pengawa nanam baru (enrichment planting) kayu ba sitak konsesi diri empu ba tikas ke engkeman dikena nukar kayu ke udah ditebang.
Ngurangka kelalu bepanggai ngagai asil penatai pemisi Sarawak ari kayu tang ngalih ngagai penatai ekonomi baru baka Dagang Karbon.
Pengawa nguna teknologi kampung enggau geospatial dalam ngatur enggau konservasyen kampung.
Hamden madah, bepelasarka semua pengawa ke udah digaga, Sarawak deka ngetanka pemesai bungkur kampung enggau ngintu rampa menua enggau meruan ke pengelantang rayat. – TVS
