KUCHING, 23 Mac: Kuasa muzik ulih ngempuruka komuniti enda ngira bansa, agama enggau penatai sida, ku Presiden Gerempung Anak Seni Malaysia (PASIMA) Isa Lee.
Iya madah, pekara tu nyata dipeda nengah aktiviti busking keterubah diatur PASIMA di Waterfront Lubok Antu ba pun bulan tu tadi.
“Pengawa ke diatur kami nya chukup dikerindu mensia mayuh laban ukai semina belagu aja tang mega bisi mandangka main asal Iban baka bepantun enggau ngajat,” ku iya maya dipinta meri timbal bekaul enggau aktiviti busking ke kala diatur PASIMA, sebedau tu.
Berebak enggau nya, Isa madah kebuah PASIMA ngatur aktiviti busking di Lubok Antu ngambika mensia mayuh lebih agi rayat ba menua pesisir nemu enggau lebih nyentuk baka ni gaya pengawa busking dipejalaika.
“Nyadi aktiviti busking tu dipejalaika enggau rindu ati, kelimpah ari belagu dia kitai ulih ngedut kaul segulai sejalai enggau pangan diri.
“Nya mih tuju kami ke amat mai aktiviti busking ngagai menua pesisir.
“Nengah aktiviti nya kitai ulih meda aktiviti muzik tu ulih gempuruka mensia mayuh, nya mih kuasa muzik ke chukup besai reti dipeda aku.
“Semua orang bela datai enda ngira bansa, agama sida bela beperindang ba siti endur,”ku iya.
Udah nya, Isa meri terima kasih mayuh ngagai perayat lubok antu laban udah meri timbal ke chukup manah ngagai program busking keterubah nya.
“Nya alai aku meri terima kasih mayuh ngagai semua perayat ke diau ba Lubok Antu,”ku iya.
Ke penemu, urung 200 iku temuai bisi datai ngemataka program busking nya ke diatur kena 5 March tu tadi.
Kelimpah diperindang penanyi veteran tebilang Iban, Dato Zamry Amera dia mensia mayuh ke bisi datai mega chukup nyinuk mendingka pantun Iban disadaka siku orang tebangkar bepantun iya nya Roselind Muntai.-TVS
