KRIAN, 23 Mac: Jasa siku tuai raban bansa, Ali anak Bin ke beumur 79 taun sekumbang bejalaika pengawa nyadi penghulu nyaga sitak ai Awik Krian, Saratok deka meruan dikeingat rayat di menua nya.
Ali dikelala siku tuai ke chukup siru lalu udah mangku pengawa nyadi penghulu pengelama 19 taun kenyau ari taun 2004 nyentuk 2023.
Beduduk ari nya, Kaban Kunsil Nengeri (ADUN) Krian Friday Belik madah pengawa ke Ali ti udah badu nyadi penghulu nya chukup diasai laban iya siku ketuai ke balat dibasa mensia mayuh.
Pengawa Ali ke badu nyadi penghulu tau disema baka ‘geliga’ ti lenyau ari komuniti kitai ditu ke alai iya (Ali) udah nunjuk ke kualiti nyadi ketuai ti tinggi sereta chukup dibasa mensia mayuh di Saratok ditu.
Nangkan ke nya, Friday mega madahka pengawa Ali ke udah sanggup mangku pengawa nyadi penghulu sechara volunteer patut nyadi ke chunto ngagai orang bukai.
“Pengawa iya (Ali) nyadi ketuai patut diambi nyadi ke siti chunto ngagai orang bukai ke alai iya udah gawa sechara volunteer, uji kitai meda dalam timpuh 56 taun ari umur iya diatu 79 taun lalu iya semina lepas ari pengawa perintah enggau gawa ke komuniti sepengelama 23 taun ari semua penyampau umur iya nyadi tu siti jasa ke chukup besai,” ku iya.
Friday mansutka penemu nya rambau Pengerami Ngingatka Jasa Ali Anak Bin ke udah badu nyadi penghulu diatur ba Dewan Opis Pelilih saratok, apin lama.
Berebak enggau nya, maya dirandau TVS, Ali ngarap ke orang ke nganti penuduk iya udah tu ila ulih neruska pengawa ngemansangka agi tanah puang ba sitak Awik.
“Siti agi ke ditinggal ke aku laban tanah kami di menua Awik tu agi mayuh puang agi bisi ngagai ribu hektar iya nyadi nya utai ke agi asuh ku tampung bala sebarang ke nganti ku ila minta nama utai ke patut dikereja ba tanah ke puang nya mih,” ku iya.
Ke penerang, sebedau dipadu nyadi penghulu sitak Awik, Ali kala gawa nyadi pengajar enggau kala nerima basa ari perintah Sarawak baka Pingat Perkhidmatan Setia (PPS), Pingat Bintara Bintang Sarawak (BBS) enggau Ahli Bintang Sarawak (ABS). -TVS
