KUCHING, 17 Mac: Perintah Sarawak dibaruh iring Premier Sarawak Datuk Patinggi Tan Sri Abang Johari Tun Openg seruran menatika isu bekaul status peranak menua ke ngaul rayat di nengeri tu.
Iya madahka pekara nya deka terus diputar nengah Opis Menteri Pemansang Indu, Nembiak Mit enggau Pengelantang Komuniti Sarawak (KPWK) ti dituaika Datuk Seri Fatimah Abdullah.
“Kuasa ngemendarka peminta status nyadi peranak menua Malaysia ba baruh kuasa Opis Menteri Dalam Menua renggat perintah besai.
“Minta dokumen tu begunaka timpuh ti kelalu lama lalu meri penanggul ngagai nembiak ngulihka akses pelajar enggau pengerai ke bisi disediaka perintah.
“Nya kebuah, perintah Sarawak ngiga chara ti engkeman iya nya raban tu tau diberi dokumen sementara sebedau nerima dokumen ti sah,” ku iya maya pengawa Nyerahka Dokumen Sementara Orang ke Nadai Status Peranak Menua di Sarawak (DSITKS) ditu, kemari.
Abang Johari nerangka perintah Sarawak nengah KPWK benung bejalaika pansik senentang penyampau nembiak mit di Sarawak ke bedau bulih status nyadi peranak menua sereta meda sekeda penanggul ti nekul sida.
“Nyadi ngagai apai indai ke nerima dokumen sementara tu aku meri pengaga ati ngambi ke anak kitai ulih besekula laban nya endang hak anak diberi pelajar ke menyana.
“Nya mih kebuah kami ba renggat perintah ngiga chara dikena mantu mutarka isu tu laban kuasa ngeluarka dokumen nyadi peranak menua tu ba baruh kuasa perintah besai,” tandu iya. – TVS
