KUCHING, 17 Mac: Pengawa ngatur main elektronik (e-lumba) diatur Opis Nembiak enggau Lumba Menua begulai enggau Gerempung Main Elektronik Nengeri Sarawak (SESA) ulih nyungkak dagang temuai enggau penatai pemain sereta raban ari menua luar ngusung Sarawak.
Direktor Nembiak enggau Lumba Menua, Sarawak Lamat Nyalau madah, kelimpah bepekit dalam mayuh bengkah e-lumba, bala pemekit mega ulih raun enggau ngelala adat lokal.
“Kelimpah bepekit ba pekit e-lumba enggau bepeluang raun nyadi aku merambu kita nguna peluang tu beratika pemanah enggau penyelai ke bisi ba mengeri Kuching,” ku iya maya Pengerami Makai Lemai Pekit Dibasa MyBorneo E-Force 2.0 ditu, malam tadi.
Sama bisi datai, Penulung Direktor Unit E-Lumba JBSN Rafidah Abu Bakar Lim, Sapit Direktor Opis Nembiak enggau Lumba Menua, Sarawak Ronnie Boniface Nugi enggau Presiden SESA Afiq Fadhli Narawi.
Program ninting taun nya diatur kena Disember 2022 lalu renggat bepilih dipasuk lebih 1,400 iku nyengkaum ari Malaysia, Indonesia, Singapura enggau Brunei.
Empat main video ke dipekitka ba pekit tu baka DOTA 2, Mobile Legends: Bang Bang (MLBB), PUBG Mobile enggau MotoGP 20 dikena ngerebut gelar King of Borneo 2023.
Renggat kepenudi pekit tu deka diatur kena 19 Mac tu. – TVS
