KUCHING, 17 Mac: Bisi 45 iku nembiak mit nerima Dokumen Sementara Orang ke Nadai Status Peranak Menua di Sarawak (DSITKS) ari Premier Sarawak Datuk Patinggi Tan Sri Abang Johari Tun Openg ba Wisma Bapa Malaysia, kemari.
Menteri Pemansang Indu, Nembiak Mit enggau Pengelantang Komuniti (KPWK), Datuk Seri Fatimah Abdullah madahka naka tu bisi 86 peminta DSITKS dikemendarka nengah Opis Premier Sarawak sereta dikeluarka kena 24 Februari 2023.
Iya madahka ari penyampau nya, 13 penerima udah bulih pemendar status peranak menua Malaysia ba baruh Pekara 15A, Konstitusyen Perintah Besai kena 9 Mac 2023.
“Sida ke dikemendarka nerima DSITKS tu iya nya siku-siku orang tauka nembiak mit ti ada di Sarawak, ke alai siku ari apai indai kandung sida peranak menua Malaysia mendam di Sarawak, mesti bisi setipikit pengada ti direjister ba Sarawak sereta ngembuan status peranak menua ke bedau ditentuka, udah kala minta nyadi peranak menua Malaysia nitihka Perkara 15A, Konstitusyen Perintah Malaysia sereta beumur 21 taun ke baruh.
“Bisi mega sida ke minta DSITKS tu umur sida lebih ari 21 taun,” ku iya maya pengawa Nyerahka Dokumen Sementara Orang ke Nadai Status Peranak Menua di Sarawak (DSITKS) ditu.
Nangkan ke nya, Fatimah nerangka timpuh ti disaran alai ngeluarka DSITKS tu iya nya 37 hari gawa sereta timpuh sah diberi pengelama dua taun ari hari bulan dokumen nya dikeluarka.
“Siti ari tuju perintah Sarawak ngeluarka DSITKS ngambi ke nembiak mit ti bedau bisi status peranak menua ulih diterima masuk ke institusyen pelajar perintah di Sarawak sereta enda ibuh nitihka penetap ngembuan pas nembiak laban nembiak nya enda ulih diberi pas bepelasarka atur Opis Imigresyen Malaysia Sarawak,” tandu iya.
Berebak enggau nya, Fatimah madahka program nyerahka DSITKS ngagai nembiak ti patut nerima nya endang nemban berindik ari sekula ungkup taun 2023/2024 deka berengkah kena 20 Mac 2023. – TVS
