KOTA SAMARAHAN, 14 Mac: Pengawa ngaga tekat hidroelektrik di Malinau, Kalimantan Utara ti deka nyadi pengeluar kuasa karan deka ngemujurka juluk ngaga Grid Borneo.
Sapit Premier Sarawak, Datuk Amar Awang Tengah Ali Hasan madah, tekat ti deka dikemansangka ba menua Indonesia nya ngaul Sarawak Energy Berhad (SEB) lalu disambung ngagai sekeda endur di Sarawak.
“Kitai nemu iya nya di Sarawak tu kitai deka ngemeratka pemansang sektor kuasa, nengah kuasa karan ulih dikemaru tu kitai deka ngembuan potensi ngemansangka sesebengkah endur nengah kuasa hidro.
“Nya alai enti semua nya mujur dikemansang kitai deka nyadi sebagi ari palan kuasa lebih agi ungkup sitak tu,” ku iya.
Iya mansutka pekara nya ba Pengawa Nyerahka Chek Pampas Projek-Projek di bagi menua Samarahan diatur ba Dewan Suarah Kota Samarahan, kemari.
Iya mega nerangka, perintah Malaysia enggau Indonesia mega ngembuan juluk numbuhka adan menua begulai nengah projek ti nyikap guna kuasa hidroelektrik ba kededua menua tu.
Kena ke 1 Mac tu tadi, Premier Sarawak, Datuk Patinggi Tan Sri Abang Johari Tun Openg disempulang raban pemesai ari menua tu bisi ngulu pengawa nasih tanah projek nya ti dipenyadika Presiden Indonesia, Joko Widodo.-TVS
