KUALA LUMPUR, 13 Mac: Parlimen dipadahka agi mayuh raban veteran Raban Soldadu Malaysia (ATM) di Sabah enggau Sarawak bedau ngerejister diri nerima Bantu Kos Pengidup (BSH).
Menteri Penyaga Menua, Datuk Seri Mohamad Hasan madah, diatu penyampau veteran ke berejister lebih 200,000 iku tang opis menteri tetemuka mayuh veteran ATM ke empai rejister ari dua wilayah menua nya.
“Pekara nya ngalitka ati kami (pia mega) Direktor Opis Pekara Veteran udah bekejang ke Sabah laban deka nentuka pengelantang pendiau enggau pekara raban veteran ke agi mayuh bedau berejister nerima perati,” ku iya.
Iya madah munyi nya maya nyaut tanya Muhammad Islahuddin Abas (Perikatan Nasional – Mersing) ti deka nemu naka ni pejalai skim BSH ngagai veteran ATM ke nadai nerima pinchin lebih agi raban kategori B40.
Mohamad madah, nengah BSH, perintah meri bantu sepenyampau RM300 sebulan ngagai raban veteran ATM ke nadai pinchin diatur Opis Pekara Veteran dibaruh Opis Menteri Penyaga Menua.
Nangkan ke nya, Mohamad madah, bantu nua endang sebengkah ari inisiatif ti disediaka opis nya dikena nyaga pengelantang bala veteran ATM.
“Bisi 97 peratus ari 9,000 penerima BSH endang veteran ke nadai pinchin enggau sigi patut nerima bantu nya,” ku iya.
Dudi hari ila, iya mega madah opis menteri merambu deka nambahka penyampau penerima BSH ngagai 15,000 orang.
“Nyema dikemendar, agih belanja tambah sepenyampau RM21 juta deka diperundingka ungkup veteran beumur 80 taun ke atas sereta ngagai sida ke patut,” ku iya. -TVS
