BINTULU, 12 Mac: Siti kes pemati ketegal rabies dirikodka di Bintulu pengudah sampel kes ditetapka positif ba pun bulan Januari taun tu.
Pegawai Opis Pengerai Bagi Menua Bintulu, Dr Melvin Chung Hsien Liang madahka kes nya ngaul siku peranak Indonesia ke gawa ba sebuah kilang industri di Kemena.
“Nyadi baka ke ditemu kitai ba Bintulu taun tu bisi ngerikodka siti kes pemati ketegal penyakit rabies ke ngaul siku pekereja asing ke gawa ba kilang batang.
“Sampel tudah sebedau tu ditetapka positif rabies,” ku iya.
Beduduk enggau nya, Dr Melvin ngelalau pengani rumah panjai di pelilih Bintulu anang semak ukui ti dipeda bekedayau laban nangi ke ukai nya bisi mai virus rabies.
“Kebuah aku ngemeratka pekara tu laban kami ba Opis Pengerai diberi kuasa matau kes ti diketup jelu sekalika ukui, mayau tauka jelu siga bukai ke bisi tulang belakang.
“Berindik enggau nya, kami ngarapka semua pengani rumah panjai di pelilih Bintulu anang semak tauka negu jelu lelang ke nadai orang ngempu sereta enda temu asal penatai,” tandu iya.
Be pengerembai ke sama, iya madahka bisi lima kandang endur tumpuk angat ti ditukuka Opis Veterinar sitak ke bisi risiko alai virus rabies berampit.
“Naka ke diatu, nitihka rikod ti diberi Opis Veterinar bisi lima kandang endur ke nyadi tumpuk angat baka ba endur Shin Yang Plywood, Jalai Tun Hussein Onn, Jalai Nebing Tasik Bintulu Kuala Tatau, Pasar Sebauh enggau Pasar Tatau,” ku iya madah agi.
Dr Melvin nerangka virus ke berampit nya ulih nabanka nyawa berindik ari inkubasyen rabies dalam tubuh mensia iya nya tiga bulan lalu nya kira laun disidi.
Iya mega ngelalau mensia mayuh nganjung ukui enggau mayau ke diinang sida betuchuk vaksin rabies ke diberi pechuma ba Opis Veterinar Bagi Menua Bintulu. – TVS
