KUCHING, 12 Mac: Bekebun siti ari pengawa dagang ke sigi ditemu meri mayuh penguntung, lebih agi bekebun chara moden ti majak dikerindu ke raban siswa.
Nya alai, siku siswa ke benung ngambi kus Diploma Kejuruteraan Pertanian ba Universiti Putra Malaysia Kampus Bintulu (UPMKB), Mardeelan Roland madahka bekebun chara moden lebih nyamai dikereja ti dibanding nguna chara lama tauka tradisional.
“Enti nyema siku-siku orang nya rindu ke pengawa bekebun chara moden mesti nyikap diri enggau penemu baru lebih agi teknologi.
“Lebuh kitai nanam sayur enggau buah nguna chara moden baka fertigasyen, pengawa lebih muddah sereta berurun lebih agi maya meri ai, sum sigi udah ditetapka tiga kali sehari,” ku iya.
Mardeelan ke diatu benung bejalaika praktikal ba Palan Tibang Pengeluar Pemakai (TKPM) Rampangi nerangka sida ke deka nguji bekebun chara moden anang nangi laban pansik udah dipejalaika ejensi ke bekaul senentang entara bansa penyakit, indu utai ke ngachau utai tanam ba nalan baka TKPM.
“Pia mega, sida uda nemu bansa rachun enggau sum ke patut dikena sereta manah ngambi ke utai tanam jampat tuai sereta bekualiti,” tandu iya.
Nangkan ke nya, iya madahka ngambi kus tauka program bekebun chara moden sigi beguna awak ke pekebun diberi penerang ke baru sereta mantu sida ngelala entara pekara ke patut dikereja lebuh nanam sayur tauka buah nguna teknologi.
“Baka chunto sida ke badu gawa tauka udah pinchin sida ulih nguji bekebun chara moden, chara mit belabuh ari baruh dulu. Enti udah bisi belanja sida ulih bekebun bedandang sereta nengah kus kitai diajar chara nanam, nyendiaka nalan baka baris tu, sukat ke betul, kitai sigi dipadahka orang,” ku iya madah agi.
Siku pekebun moden ke kala ngambi kus pengatur ladang pemakai ba universiti, Pauline Natie Banyoi nerangka chara bekebun moden mudah agi dipelajar enggau diperetika.
“Pemanah kitai bekebun chara moden tu iya nya kitai enda nguna mayuh pekereja laban kitai semina nguna orang ke bisi penemu enggau pengelandik ngena perengka ke dikumbai Internet of Things (IOT),” ku iya madah.
Bepelasarka rikod, Sarawak deka nentuka rentayan bekal pemakai semampai chukup dikena nangkup peminta ari rayat di nengeri tu.
Nya entara kebuah perintah Sarawak bisi numbuhka Opis Menteri Industri Pemakai, Komoditi enggau Pemansang Wilayah Sarawak (M-FICORD) ti betuaika Dato Sri Dr Stephen Rundi Utom. – TVS
