IPOH, 12 Mac: Pengawa mekuhka konsep Malaysia Madani mesti ngemeratka pekara ti adil ngagai semua komuniti ngambika pengelantang nya ulih diasai ke semua raban.
Menteri Besai Datuk Seri Anwar Ibrahim madah kelai pemansang sesebengkah bansa enda ibuh disukat enggau peninggi begunan aja tang mega patut sebela entara pemisi orang pemesai enggau rayat.
“Ambika banding entara rumah meligai enggau rumah rayat, entara restauran lima bintang enggau kedai-kedai ke dijaga sereta diberi perengkaguna ngambika manah dipeda sereta beresi.
Nya alai, ba Ipoh lebih agi patut tebilang ukai ketegal pemanah kelai aja tang mega kedai iya patut manah, kedai rayat dipeda mayuh diintu patut diberi sukung dikena nentuka iya meruan manah enggau beresi,” ku iya.
Iya madah munyi nya maya bejadika Pengerami Hari Lanskap Menua 2023 (HLN2023) ke diatur ba Taman D.R. Seenivasagam, Ipoh Perak, kemari.
Menteri Besai mega madah atur nya patut bepun ari renggat perintah lokal ba semua nengeri dikena nentuka semua rayat enggau raban bansa dijaga enggau diintu meruan.
“Kuala Lumpur, bisi bepuluh projek (pemansang) baka tu, bisi Twin Towers, KL Towers tang kedai luya baka taun 50 an. Nyadi nyau dipeda baka pemansang ke dilanggur nya nguntungka siti raban aja.
“Aku enggai meda utai baka tu laban aku deka meda Malaysia Madani tu mesti nentuka semua rayat semua bansa dijaga enggau diintu manah,” ku iya.
Iya mega meri jaku tangkan ngagai semua Datuk Bandar enggau Chairman Perintah Lokal (PBT) ba serata menua beratika baru pelin pemansang sida ngambika juluk pemansang ke sebela ulih dikemujur.
Ku iya, taja pan perambu nya udah digaga tang agi enda seriris enggau bedau laun endur mungkal perambu ke lebih manah ungkup tuju nya.
Perintah Penyerakup mega udah ngeluarka sepenyampau agih belanja pemansang ke sebela.
Menteri Besai mega madah perintah deka nentuka konsep pemansang nadai bepampas dipajak nyengkaum nadai agih pemansang sekalika ba renggat nengeri diambi nadai pemendar.
“Kitai sigi enda ngemendarka barang sapa orang peneka ati ngauk hak rayat enggau ngasaika (diri) ulih telepas.
”Aku deka nentuka pekara tu nadai nyadi.
“Beri peluang ngagai perintah meresi menua ari perumpak besai enggau numpu ngagai pekara ngemansangka rayat,” ku iya.-TVS
