KUCHING, 11 Mac: Rebak baru diperansang anang enggai belajar ngeraut bungai jarau laban nya diatu siti ari kereban pesaka bansa Dayak ke bisi rega sereta nerima peminta ke chukup manah ulih dikena nyungkak penatai pemisi diri.
Ku siku ari Orang Ulu (Lahanan) ke landik ngaga bungai jarau, Ngo Hawing, 57 taun, bungai jarau chukup mayuh dipinta penguna iya nya berengkah ari pun taun nyentuk ngagai bulan Julai.
“Ambika chunto ba Jalai Main Bazar ditu, bisi empat buat kedai krafjari ngudar bungai jarau ari aku ninting hari.
“Nyadi aku nyau disema baka kilang nyendiaka 30 iti dalam sehari. Tu kebendar enda ulih dikereja aku kediri laban peminta tu chukup mayuh diudar berengkah ari bulan Januari nyentuk Julai.
“Nya alai, aku mai Tuai ASADIA (Akademi Serakup Dayak Iban Sarawak), Mabong Unggang patut muka kelas ngaga bungai jarau ngambika bisi rebak baru nemu lalu sama besaup nangkup peminta makit bungai jarau tu,” ku iya maya dirandau TVS ba Indu Opis SADIA Kuching, apin lama ke udah.
Dulu ari nya, Ngo ke mega pengajar kelas bungai jarau ba ASADIA bisi nerangka tuju Orang Ulu ngibun bungai jarau kelia iya nya kesatu endang adat, kedua nyadika perengka pengias lalu diatu kereban tu chukup manah dipelajar laban ulih nyadi pun penatai pemisi.
Berebak enggau nya, Tuai ASADIA Mabong madah enti ba daya idup bansa Iban kelia tuju bungai jarau digaga endang chukup besai amat reti maya jeman orang agi bekayau tang diatu bungai jarau digaga ungkup tuju pemandang tauka perengka pengias palan pengerami sereta digaga nyadi ke tepa.
“Kelia enti orang nganjung bungai jarau ngagai pendai, disangkingka orang enggau papung lutan lalu diujak ba pendai.
“Nyadi pengudah meda kelai nya, raban orang ke indu enggau nembiak deka mupuk ngelarika diri jauh ari rumah panjai ngelawa endur ke lebih likun lalu semina orang lelaki ke kering aja ninggalka diri ngibun rumah panjai.
“Reti nya, enti orang bisi ngujakka bungai jarau semak kandang rumah nya siti ari kelai munsuh deka datai nyerang.
“Nya mih siti ari kelai enggau tuju ngagai bungai jarau kelia, tang diatu menua udah likun bungai jarau chukup mayuh orang minta laban deka diguna sida nyadika barang pengias sekalinya ba pintu rumah diri empu tauka palan ngatur sesebengkah pengerami,” ku iya.
Nya alai, ku Mabong ASADIA Kuching udah tu deka muka kelas ngaga bungai jarau bepalan ba Indu Opis SADIA ngambika mayuh agi raban nemu ngaga perengka asal tu sereta awakka iya meruan dipeda nyentuk ke jemah ila.-TVS
