SIBU, 10 Mac: Ketegal kelalu arap ngagai siti iklan pengawa puang nyadi pemantu online dalam laman instagram siku indu peranak menua tu napi pengerugi lebih RM45,000 pengudah iya nemu diri ditipu ‘scammer’.
Tudah, beumur 34 taun gawa ba sebuah serikat peribit ditu terubah iya tepaut ati enggau iklan pengawa puang nya kena Hari Tiga tu tadi.
Tuai Polis Pelilih Sibu, Asisten Komisioner (ACP) Zulkipli Suhaili madah, tudah laban ke tepaut ati meda iklan nya terus nganjung pesan pandak nuju lumur telefon ke bisi dipadah nya.
“Seninjik iya udah madahka diri setuju nerima pangku pengawa nya, tudah dipinta rejister penerang diri enggau mega muka siti akaun ba siti laman web ngambika bulih pengawa ke dipinta.
“Udah nya, tudah dipinta ngeletak bayar ngagai lima akaun bank ke bebida sepenyampau RM45,049.99 ngena duit simpan iya empu ngambika bulih komisyen barang ke udah direjister ngena nama tudah,” ku Zulkipli.
Nangkan ke nya, ku Zulkipli tudah indu nya nnyau nemu diri kena tipu pengudah komisyen ke disemaya lalu enda masuk, pengujung iya dia iya ngaga ripot polis kena pukul 10 pagi, 8 March tu tadi.
“Jera enggau ulah diri empu tudah datai ngaga ripot polis ba Begian Pansik Penyalah Komersial IPS Sibu enggau madah diri udah rugi manggai RM45, 049.99.
“Nyadi, udah suah aku ngelalau mensia mayuh anang mudah arap tauka tepaut ati enggau sebarang pengawa dibantai ba media rama ti besemaya meri untung besai.
“Peresa silik enggau serikat tauka ejensi bekaul sebedau minta tauka nerima sebarang aja kangau gawa ti nyelai,” ku iya.
Iya nyemetak madah, mensia mayuh ulih meresa ba balai polis ke semak tauka peresa lumur telefon ke ayan.
Ke penemu mensia mayuh, tu entara chara ke ulih diguna dikena meresa lumur telefon raban Scammer, peresa nengah laman web “http://semakmuke.rmp.gov.my, telefon terus nuju CCID INDOLINE ba lumur 013-2111222, CCID Response Centre ba lumur 03- 26101559/03-26101599, tauka Facebook CYBERCRIMEALERTRMP enggau Palan Respons Scam Nasional (NSRC) ba lumur 997.- TVS
