LAWAS, 10 Mac: Penanggul suntuk pengereja pengawa ari Indonesia nadai nekul pejalai projek-projek pemansang ba Sarawak.
Sapit Premier Sarawak Datuk Amar Awang Tengah Ali Hasan madah, perintah ngembuan perambu dikena nentuka projek ba Sarawak terus bejalai baka selama.
Kenu ku iya, perintah Sarawak udah numbuhka siti unit ba Opis Premier Sarawak lebih agi ungkup orang gawa, imigresyen enggau patau projek dikena napi isu suntuk orang gawa.
“Kitai ulih meda pengulih, pengelandik ke diguna kitai lalu nya kebuah perintah nengeri kitai bisi siti unit dibaruh iring Sapit Menteri ba Opis Premier Sarawak (Pengereja Pengawa, Imigresyen enggau Patau Projek) Dato Gerawat Gala,” ku iya maya penemuai ngagai taba projek ngaga Kompleks Administresyen Lawas ditu, kemari.
Sama datai Sapit Menteri Infrastruktur enggau Pemansang Penyangkai Kapal Aidel Lariwoo.
Awang Tengah mega nesau bisi orang gawa peranak menua asal ditu ngisi pangku pengawa puang dalam mayuh bengkah projek pemansang di Lawas nitihka pengelandik sida.
Berebak enggau nya, iya minta komuniti Lawas ke bisi pengelandik dalam bidang pemansang patut lengkas ngerebut peluang gawa ke semitan enggau pengulih diri.
Peluang enggau ruang lebih agi ku iya patut direbut komuniti Lawas ngambika pejalai projek ba pelilih tu enda semina bepanggai penuh ngagai pengereja pengawa luar. – TVS
