KUALA LUMPUR, 9 Mac: Perintah nengah Opis Menteri Pengangkut (MOT) deka baum enggau serikat penerebai bilun senentang meri tambang lebih murah ngagai siswa lebih agi ke Sabah enggau Sarawak.
Nitihka penerang berita ari BERNAMA, Menteri Pengangkut Malaysia, Anthony Loke madahka naka ke diatu semina Malaysia Airlines (MAS) bisi meri diskaun 30 peratus ari rega tikit bilun ngagai siswa ke berejister ba baruh program nya.
“Sekeda ari pemanah ke diberi nengah program nya baka elawin bagasi tambah 10 kilogram enggau diskaun khas ngaul diri sebilik sereta kaban siswa ke bukai.
“Kitai mega nguji deka baum enggau serikat penerebai bilun ke bukai senentang nyendiaka pakej murah ngagai raban siswa,” ku iya madah rambau nyaut tanya tambah ti dibantaika Kaban Parlimen Sandakan Vivian Wong Shir Yee ti deka nemu sekalika perintah sedia meri pakej penerebai bilun ba rega ke patut ngagai siswa ari Sabah enggau Sarawak maya kemisi semester.
MOT nengah Suruhanjaya Penerbangan Malaysia (MAVCOM) deka terus matau rega tikit bilun ti ngaul penerebai domestik nyerangkung entara Semenanjung Malaysia enggau Sabah.
Pia mega, nengah kaul nya bisi serikat ti bejalaika inisiatif khas nyendiaka tiket bilun ba rega ke enda kelalu mar baka AirAsia Aviation Group Limited (AAAGL) ti udah nyendiaka 52 penerebai tambah tambang murah ari 17 nyentuk 30 Januari taun tu beserimbai enggau pengerami Taun Baru Cina.
Nangkan ke nya, Loke nerangka MOT enda kala nagang serikat penerebai bilun nambahka penerebai sida ti bepelasarka timbang komersial.
“Sebedau tu sekeda serikat penerebai bilun sigi bejalaika pengawa nya enti nyema bisi kapasiti enggau peminta ke tinggi ,” tandu iya.
