DEBAK, 2 Mac: Projek selapah bah ke ngaul tiga genturung pendiau di Debak ke suah ampuh maya musim landas deka digaga jampat.
Menteri Infrastruktur enggau Pemansang Penyangkai Kapal, Datuk Amar Douglas Uggah Embas madahka sigi bisi perambu ngaga selapat bah ba sekeda kandang endur ke mudah ampuh di Debak sebedau tu tang tejanggal ketegal penanggul bukai ke nekul.
“Tang aku pechaya penanggul nya ulih diputarka lengkas ngambi ke projek selapat bah ke ngaul Kampung Lalang, Kampung Bungey enggau Kampung Babu ulih digaga jampat.
“Kitai sigi menatika pengelantang enggau pengelikun rayat ke mendam ba genturung pendiau tu ke mudah ampuh enti nyema ujan bangat,” ku iya madah.
Uggah ke mega Sapit Premier Sarawak ngarapka projek nya ke kala dipinta Kaban Kunsil Nengeri (ADUN) Saribas Mohammad razi Sitam enggau Kaban Parlimen Betong ke lama Datuk Robert Lawson Chuat enggau Kaban Parlimen Betong ke baru Dr Richard Rapu sereta iya empu jampat agi dipejalaika ungkup pemaik rayat.
“Kelimpah ari nya, kitai ngarapka Opis Parit enggau Entali Ai (DID) ulih lengkas mutarka penanggul entali ai ba kandang endur tu,” tandu iya.
Iya ke mega Kaban Kunsil Nengeri (ADUN) Bukit Saban mansutka jaku nya rambau dirandau pengarang berita pengudah ngabas PPS Dewan Millenia lebuh Hari Empat.
Sama bisi datai iya nya Residen Bagi Menua Betong Richard Michael Abunawas enggau Pegawai Pelilih (DO) Betong Alfred Geling Ason. -TVS
