KUALA LUMPUR, 1 Mac: Pengelantang rayat ke tebunsa ketegal penusah ngenyit di menua tu terus dikenatika perintah.
Sapit Menteri ba Opis Menteri Besai (Pekara Sabah enggau Sarawak enggau Pengawa Khas), Datuk Wilson Ugak Kumbong madahka perintah deka terus meri bantu ngagai peranak ke tebunsa ketegal penusah ngenyit ti nyengkaum Bantuan Wang Ihsan (BWI) penyampau RM1,000 ngagai tetiap ruang bilik (KIR) sereta RM10,000 ngagai waris orang ke bebadi nyawa ketegal penusah ngenyit nya.
Ku iya madah, perintah mega bisi nyendiaka Bantuan Barangan Keperluan Asas (BBKA) penyampau RM2,500 ngagai tetiap (KIR) enggau Bantu Nyeruri Rumah (BPR) enggau taka penyampau maksimum manggai RM5,000.
“Kelimpah ari nya, enti nyema pengerusak rumah nya lebih ari RM5,000 pengawa nyeruri deka dipejalaika Opis Menteri Pemansang Menua Pesisir enggau Kandang Menua (KPDW) sereta Opis Menteri Kaunsil Kandang Menua (KPKT) nguna turu ke udah disediaka opis menteri sida empu.
“Ungkup penusah ngenyit ke nyadi ukai dalam timpuh Monsun Timur Laut, perintah deka meri bantu BWI ngagai tetiap KIR ke patut nerima bantu nya,” ku iya madah.
Iya bejaku munyi nya rambau nyaut tanya ari Kaban Parlimen Baram Dato Anyi Ngau bekaul enggau bansa sereta penyampau bantu ke diberi ngagai orang ke tebunsa ketegal penusah ngenyit baka bah enggau angus ba endur sida diau.
Kelimpah ari nya, iya madahka ungkup orang ke dipindahka ngagai Palan Pengenduh (PPS), KIR peranak Malaysia ulih bemalin ngagai PPS ti semak alai sida diau senentang minta bantu lalu ungkup sida ke enda dipindahka ngagai PPS ulih minta ngagai tuai komuniti sida empu.
Iya nerangka pemendar ungkup peminta tu bepanggai ba Pegawai Pelilih (DO) ke mega Chairman Komiti Penyangga Penusah Ngenyit Pelilih (JPBD).
