Hari berunggu ujan kenyau Hari Enam minggu siti nyin kemari ba sekeda kandang menua di Sarawak ngasuh tikas ai majak niki.
Bepelasarka ripot Opis Meteorologi Malaysia (MetMalaysia), gaya berunggu ujan ba tikas bejejaga disadang nyadi ngaul sekeda kandang endur baka di Kuching, Serian, Samarahan, Sri Aman, Betong, Sarikei, Sibu, Mukah enggau Bintulu (Tatau enggau Bintulu) nyentuk sehari tu (1 Mac).
Beduduk enggau nya, mensia mayuh ti deka nemu penerang pemadu baru senentang gaya hari ulih ngelawa laman web rasmi Opis, aplikasyen mobil myCuaca sereta laman media rama rasmi Opis.
Mensia mayuh mega ulih betelefon ngagai lumur hotline MET Malaysia 1-300-22-1638 enti sema bisi pekara ke deka ditanya silik.
Sebedau tu, MET Malaysia nerangka, ujan monsun dijangka nyadi nyentuk 4 Mac 2023.
“Gaya tu ulih ngasuh ujan berunggu ba barat enggau tengah Sarawak sereta Semenanjung.
“Berindik enggau nya, MET Malaysia udah mansutka Gerah Ujan Berunggu ke ngaul kedua-dua kandang menua nya nyentuk 2 Mac 2023,” ku iya madah.
