KUCHING, 26 Feb: Agih belanja ke diberi ngagai Sarawak deka ditumpu ngagai pengawa ngemanah jalai raya enggau klinik.
Premier Sarawak, Datuk Patinggi Tan Sri Abang Johari Tun Openg madah, perintah Sarawak deka neruska pengawa ngaga jalai-jalai raya sereta nyikap perengkaguna utiliti baka bekal karan enggau ai ba sitak ke agi kurang pemansang.
“Iya, aku meri terima kasih ngagai menteri besai ke mega menteri pekara wang laban udah meri agih belanja sepenyampau RM5.6 bilion ngagai nengeri Sarawak lalu aku nerima manah atur tu dikena ngemanah sekula enggau klinik.
“Tu mega beguna ngagai kitai ba Sarawak lalu aku ngasai taja penyampau nya enda chukup tang aku patut beterima kasih mih ngarika perintah nengeri, laban kitai endang deka mantu rayat, kitai perintah, kitai deka ngaga jalai tebing pantai.
“Tu dikena mantu sida ke diau ba endur dikumbai ba sitak mesekin,” ku iya maya meri timbal penemu senentang isi Bajet 2023 pengudah Atur Taklimat enggau Pejalai Ngabas Projek Ngaga Jalai Sungai Maong ke Segedup, ditu kemari.
Berebak enggau nya, iya ke mega Kaban Kunsil Nengeri (ADUN) Gedong madah diri enda nulak nyema Menteri Besai deka meri agih belanja tambah ngagai Sarawak.
“Nyadi aku nanya Menteri Besai, taja pan Sarawak neruska, enti deka meri agi pan tau, enti deka nambah.
“Tang aku endang nerima manah taja ari sukut penyampau enda chukup, RM5.6 bilion.
Taja baka nya, Perintah Sarawak deka neruska pengawa nguna turu belanja diri empu,”ku iya. -TVS
