DARO, 22 Feb: Agih Belanja 2023 ti deka dibantaika perintah besai mesti menatika pengelantang semua rayat di menua tu nyerangkung orang berikan, bekebun, betupi, bumai sereta ke bukai.
Kaban Kunsil Nengeri (ADUN) Daro, Safiee Ahmad madahka mayuh rayat di menua pesisir begunaka bantu ari perintah besai lebih agi pengudah tebunsa ketegal pandemik COVID-19.
“Nya mih entara pengarap kitai di kandang menua pesisir ngambi ke perintah besai nengah Agih Belanja 2023 menatika pengelantang rayat di Sarawak.
“Semua kitai bela nemu Sarawak sebuah nengeri ke pemadu besai di Malaysia lalu begunaka agih belanja ti besai lebuh bejalaika projek pemansang,” ku iya madah.
Nangkan ke nya, Safiee mega nyukung penemu ari pengari rayat ke bukai senentang Sarawak diatu mekuhka pemansang infrastruktur rama, perengkaguna pengerai (klinik enggau sepital) enggau sekula ke lebih manah.
“Enti ulih perintah besai meri ungkup agih belanja ke lebih besai ngagai Sarawak awak ke ulih nangkup semua projek pemansang ti deka dipejalaika ba serata nengeri tu,” tandu iya.
Iya mansutka jaku nya lebuh ditelefon pengarang berita TVS, Hari Tiga.
Nampung sekeda berita ti dipansutka TVS sebedau tu, sekeda pengari rayat, Menteri enggau Sapit Menteri perintah Gabungan Parti Sarawak (GPS) ngarapka sektor ti meri pemanah ngagai rayat diberi perati Perintah Penyerakup rambau mantaika Agih Belanja 2023 kena Hari Lima minggu tu. – TVS
