BETONG, 22 Feb: Pemansang pelajar nembiak di menua pesisir terus dikenatika Gerempung Ukai Dikuasa Perintah (NGO) nyengkaum di Bagi Menua Betong.
Beduduk enggau nya, Chairman Layar Education Development Committee (LEDC), Paul Langgang ngarapka program pemandang pelajar tauka eksibisyen pelajar, Betong Education Fair 2023 ke diatur begulai sama enggau Serakup Pemikir Dayak (DTTAS) kena 18 Mac tu ila nerima sambut ti manah ketebal agi raban nembiak ke deka nampung pelajar ba tikas ke lebih tinggi.
Iya madahka program eksibisyen tu tebuka ngagai mensia mayuh lalu deka diatur ba Dewan Panglima Rentap, Betong.
“Raban ke disaran Education Fair tu tadi kebendar iya tebuka ngagai semua lebih agi nembiak ke udah abis peresa ba Pom Lima tauka Pom Enam.
“Pengudah sida ngambi peresa SPM tauka STPM nyadi mayuh nembiak tu tadi enda nemu kini tungga deka nampung sekula nyadi enti sida datai ngagai Education Fair tu sida ulih nemu dini alai niithka pemutus peresa sida empu,” ku iya madah.
Nangkan ke nya, Paul nerangka program baka nya ngembuan reti ti chukup besai ke alai mayuh institusyen, maktab sekalika Palan Pelajar Tinggi (IPT) bisi ngambi bagi dalam program eksibisyen tu.
“Education Fair tu tadi kebendar siti palan endur kitai ngangauka semua pengemeran pekara pelajar baka Institusyen, Maktab enggau Universiti datai ke Betong lalu mandangka utai dikemisi sida reti nya tadi sida tu ulih nulung madah ngagai orang ditu (Betong) nama tauka dini alai siku-siku nembiak nya ulih nampung pelajar,” tandu iya.
Kelimpah ari nya, iya madahka program nya bisi nyendiaka penerang ti bekaul enggau peluang gawa ba sesebengkah kompeni tauka ejensi perintah di menua tu.
“Enti sema nembiak nya enggai nampung pelajar, sida mega ulih milih dini alai deka gawa nitihka peneka sida empu laban ba Education Fair tu bisi mega penerang bekaul enggau pengawa puang laban maya nya ila bisi sebengkah program ti dikumbai kitai sukut peluang gawa,” ku iya madah agi lebuh dirandau pemberita TVS empai lama. – TVS
