KUALA LUMPUR, 22 Feb: Menteri Infrastruktur enggau Pemansang Penyangkai Kapal Datuk Amar Douglas Uggah Embas madahka surat rasmi bekaul enggau peminta Sarawak senentang ngambi baru penyangkai kapal Bintulu tauka Bintulu Port ari perintah besai nyadi penyangkai kapal ba baruh pegai Sarawak udah diserah ngagai Menteri Pengangkut Anthony Loke.
Ku iya madah naka ke diatu Anthony Loke meri timbal ke manah sereta deka neruska pengawa berunding bekaul enggau pekara nya.
“Aku udah baum enggau Menteri Pengangkut Anthony Loke sereta udah nyerahka surat rasmi ti madahka Sarawak deka Bintulu Port nyadi penyangkai kapal ba baruh bidang kuasa Sarawak.
“Aum tu manah bendar lalu iya mega nerima perambu tu. Kitai deka terus beratika pekara tu ila. Tu ukai aum kepenudi. Ila pan bisi aum ke bukai deka diatur,” ku iya madah.
Taja pia, Uggah ke mega Sapit Premier Sarawak nerangka timpuh pekara nya ulih teputar bedau temu laban mayuh pekara ti deka diserenih enggau diperatika baru.
“Aku enda ulih madahka pengelama timpuh tu laban ngaul mayuh macham pekara nyengkaum berundingka senentang MA63 (Sempekat Malaysia 1963). MA63 tu benung lanchar dipejalaika.
“Sebedau tu Menteri Besai bisi datai ke Sarawak lalu iya udah netapka Opis Kereja Raya (JKR), Opis Parit enggau Entali Ai (DID) enggau Opis Bekal Ai Menua Pesisir (JBALB) bejalaika projek nengeri ke nguna kos penyampau RM50 juta ke baruh,” tandu iya.
Uggah bejaku munyi nya rambau dirandau pemberita TVS pengudah iya baum enggau Anthony Loke lebuh Hari Tiga. – TVS
