SINGAPORE, 19 Feb: Asil kebun ari Sarawak baka nanas terus nerima peminta ke tinggi ari menua luar nyengkaum Singapore.
Nampung berita UKAS, bisi 300 nanas hibrid MD2 Sarawak udah dianjung ke Singapore ungkup ke dijual ba menua republik nya.
Beduduk enggau nya, Tuai Pegawai Eksekutif Opis Dagang enggau Dagang Temuai Sarawak Singapore (STATOS), Chew Chang Guan madahka sampel nanas nya udah dianjung ngagai pedagang menua tu ngambi ke ulih dijual ba makit.
Ku iya madah peminta asil kebun di Singapore majak nambah enggau seruran bisi lalu pengawa nganjung nanas nya mujur berindik ari sukung Gerempung Pemansang Industri Kayu Ramu Sarawak (STIDC) enggau Harvest Prime Enterprises ti gawa begulai enggau pengeluar nanas di Tanjung Manis.
“Nya kebuah penerebai terus bilun chukup beguna dikena nyungkak pemansang dagang temuai enggau dagang entara menua Singapore enggau Sarawak.
”Ambika chunto, penerebai terus bilun AirAsia ari Sibu ke Singapore ngemudahka pengawa nganjung nanas ba hari ke sama terus ngagai pemekal enggau orang tengah Singapore kami,” ku iya madah dalam siti penerang media lebuh Hari Lima.
Nangkan ke nya, Chew Chang Guan nerangka asil ari pansik ti dipejalaika STATOS, nanas hibrid MD2 Sarawak iya nya pemadu engkeman diuji dijual laban nerima peminta ke tinggi ari orang ke meli tauka penguna.
“Kami melabaka lebih mayuh peminta diterima ari Singapore berindik ari rentayan bekal ke bisi potensi udah bisi ditumbuhka,” tandu iya.
Iya madahka kerejasama ti rat nya siti singkang ke manah dikena nyukung lebih mayuh pekebun enggau pengeluar Sarawak ke bisi juluk masuk dagang ekspot.
Nampung berita TVS kena 14 Februari tu tadi, Sarawak deka ngemeranka Pemansang enggau Pansik (R&D) dalam industri nanam nanas ti mai tuju dikena ngemanahka sektor agro enggau nambahka pengeluar nanas.
Menteri Industri Pemakai, Komoditi enggau Pemansang Kandang Menua, Dato Sri Dr Stephen Rundi Utom madahka, bansa nanas baru ti dikumbai Sarawak Gold (SG1) diatu dilanchar sereta bisi daya meri asil penatai pemisi ngagai pekebun.-TVS
