KEVEN Newland tauka lebih dikelala enggau nama Ven Nel, siku influencer tauka mayuh peminat ba Tik Tok udah ngembuan urung 83.3 iku peminat kelimpah bisi ngeluarka sebuah lagu solo keterubah diberi nama ‘Lebih Ari Bekaban’.
Peranak asal ari Sri Aman nya madah lagu ‘Lebih Ari Bekaban’ ti udah trending ba penuduk lumur 16 ba pelantar media rama ‘YouTube’ ditengkebang siku komposer tebilang iban ti udah menang sekeda anugerah iya nya Hairee Francis sereta dikeluarka ba baruh perabung Francis Five Production (FFP).
“Aku bisi berita manah ke diatu baru udah ngeluarka lagu solo keterubah iya nya ‘Lebih Ari Bekaban’. Kita tau sama ninga ba YouTube Channel Francis Five Production. Lagu tu ditengkebang ke orang ke chukup dikelala kitai ba dalam industri muzik dayak, siku artis tanah air Sarawak ti chukup tebilang mega iya nya Mr. Hairee Francis,” ku iya lebuh ditanya pemberita TVS.
Ku iya, lagu ‘Lebih Ari Bekaban’ tu nguna konsep ranchak, joget sereta bisi elemen dangdut, dikena ngemanahka ke agi tiun lagu seriris enggau trend kemaya hari tu.
Lebuh ditanya pemberita TVS senentang jalai cherita lagu iya, nyadi munyi tu ku saut iya.
“Lagu tu nyeritaka pasal pejalai pengidup aku enggau mega kitai bekaban. Ambika banding kitai ukai semina deka bekaban tang deka baka diri menyadi, beambu nyadi apai indai. Pia mega enti kitai lelaki, kitai deka ngambi iya nyadi ke bini. Tu mih reti lagu tu tadi.
“Pekara tu ukai nyadi ba aku aja tang mega ba orang luar din,” ku iya.
Iya nambah, tetiap lagu ti ditengkebang ngembuan cherita kediri empu, ti mai reti ke besai ba siku-siku orang.
Kelimpah ari nya, iya ti keterubah iya ngaul diri dalam industri muzik tu ngarapka bulih sukung ari semua raban pupu bansa ti enda ngira umur, ngambika industri muzik dayak ulih majak ngerembai sereta dikelala semua orang.
Ven Nel ngarap mensia mayuh ulih nerima lagu “Lebih Ari Bekaban” seraya nyukung industri muzik dayak ngambika terus ngerembai ngagai tikas ke lebih tinggi.
Ungkup rikod, naka diatu, lagu ‘Lebih Ari Bekaban” udah manggai lebih ari 160, 000 iku orang ke meda lagu nya ba channel YouTube Francis Five Production (FFP) taja baru seminggu lebih udah dikeluarka. – TVS
