KUCHING, 14 Feb: Raban nembiak rebak baru diperansang nulis baru sejarah lisan bansa asal di Borneo ti mungkur pasal adat enggau chara pengidup orang kelia.
Sekretari Gerempung Hak Asasi Orang Asal Sarawak (SCRIPS) Micheal M Joke madah, agi mayuh adat lama orang asal bedau dichelak dalam bup.
Ku iya, mayuh pemanah enggau penguntung enti sema rebak baru ulih belajarka enggau nyerungkai senentang pekara tu dikena nambahka penemu sida.
“Kami sebuat deka ngatur Kursus Pendokumentasian Sejarah Lisan Komuniti Orang Asal Borneo laban deka mai bala nembiak rebak kitai diatu ke mayuh enda nemu pasal penatai bansa diri lebih agi ba siti-siti menua.
“Nya alai, kitai deka ngajar sida ngiga chara ti lebih manah pasal nulis sejarah, adat enggau chara idup bansa Iban kelia awak ke sida ulih belajar,” ku iya lebuh ditelefon pembrita TVS lebuh Hari Minggu.
Beduduk ari nya, iya meransang barang sapa ke bisi penemu tauka bisi nyimpan penerang tang bedau kala dichelak dalam bup ketegal enda nemu chara tau ngulu kus nya ti deka diatur kena 18 Februari di Sibu.
Ku iya, tuju ngatur kus ‘Pendokumentasian Sejarah Lisan Komuniti Orang Asal Borneo’ iya nya dikena meri tunjuk ajar ngagai penyereta chara nulis, ngemasukka sejarah komuniti diri dalam bup tauka didokumenka ungkup ke malin rebak dudi ila.
Penerang ke silik pasal kus tu, mensia mayuh tau ngelawa tauka rejister terus ba link ti disediaka tu:https://forms.gle/bfiS33w4Lc9PJ8MaA .-TVS
