MIRI, 12 Feb: Ngepan Iban endang patut digazet enggau direjister ba Serakup Pelajar, Saintifik enggau Main Asal Gempung Bansa (UNESCO) awak ke dikelala nyentuk ke tikas dunya.
Sapit Premier Sarawak, Datuk Amar Douglas Uggah Embas madahka, pengaku ari serakup nya beguna laban serakup nya ulih meri sanding penemu, nyaga, bedajaka sereta ngerembaika identiti enggau budaya siti-siti raban bansa.
“Taja pia, pengawa tu begunaka kerejasama ti rat ari entara semua orang enggau ejensi perintah nyengkaum pengemeran pesaka asal sereta Gerempung Ukai Dikuasa Perintah (NGO) Iban di serata nengeri tu,” ku iya.
Beduduk enggau nya, Uggah ngarapkaka Simposium Ngepan Iban (SNI) Renggat Sarawak ulih terus diatur ba taun bukai ti deka datai enggau enti ulih dipasuk ke ba dalam kalinda perintah Sarawak.
“Kelimpah ari SNI, langgur ngatur simposium bukai ke ngaul main asal Iban, Jaku Iban, enggau mayuh macham pekara bukai ti tau meri pemanah ngagai pengidup komuniti Iban ulih diatur dudi hari,” tandu iya.
Teks jaku iya dibacha Menteri Ba Opis Premier Sarawak, Datuk John Sikie Tayai rambau bejadika Pengerami Makai Lemai Nutup Simposium Ngepan Iban Renggat Nengeri Sarawak, ditu malam tadi.
Ku iya madah, simposium nya deka diperunding ba renggat perintah nengeri ngambi ke ulih dipasuk ba dalam kalinda program Sarawak sereta ulih diatur dua tauka tiga taun sekali jemah ila.
Bepelasarka rikod, SNI 2022 diatur pengelama dua hari belabuh ari 10 nyentuk 11 Februari 2023 ti ngangkatka rambai jaku “Ngepan Pesaka Bansa, Nyungkak Pemansang Ekonomi Bansa Iban” enggau bisi 310 iku penyereta ke ngambi bagi dalam program tu ke datai ari serata Sarawak.
Kelimpah ari nya, mayuh macham main asal Iban bisi dibantaika ba dalam program makai lemai nya nyerangkung ngajat, bepantun, begendang, enggau kuntau.
Sama bisi ngulu program makai lemai tu iya nya Sapit Menteri Infrastruktur enggau Pemansang Penyangkai Kapal Dato Majang Renggi, Sapit Menteri Nembiak, Lumba enggau Pemansang Pedagang, Dato Gerald Rentap Jabu, Kaban Kunsil Nengeri (ADUN) Krian, Friday Belik sereta temuai bukai.- TVS
