MIRI, 12 Feb: Bujang sigat ari menua Bintulu, Edmund Kruka enggau dara bajik ari menua Julau Clara Amanda Buyong udah mujur diangkat ngempu gelar Keling enggau Kumang Simposium Ngepan Iban (SNI) 2022 ke diatur ba sebuah hotel tebilang ditu, malam tadi.
Bekau ari pemujur nya, Edmund enggau Clarabela nerima perais mata duit sepenyampau RM3,000 siku seraya disempulang trofi enggau selampai.
Seduai iya mega mujur mai pulai ngepan pemadu manah ungkup lelaki enggau indu sereta perais mata duit sepenyampau RM500 siku.
Gela Laja dipenggi Hakkinen Lewis enggau Lulong SNI 2022 dipenggi Mesha Carlynie Jesse sereta seduai bela nerima perais mata duit RM2,000, trofi enggau selampai.
Nangkan ke nya, gela Sempurai dipenggi Stannish Lajang ari Song enggau Selingar Matahari dipenggi Clarissa Rinya Setian asal ari Sibu.
Seduai bela nerima perais mata duit RM1,500, trofi sereta selampai.
Pemekit lelaki enggau indu SNI ke nerima undi pemadu mayuh ba dalam Facebook Datuk Dr Penguang Manggil dipenggi Jimmy Alexson enggau Sheila Riti Jefry ti bela nerima perais mata duit RM300.
Penerima perais pengaga ati pekit Keling & Kumang SNI bela nerima mata duit RM1,000 siku.
Entudi ke nya, gela Ratu SNI mujur dipenggi Praty Sofia Bantin asal ari Bintulu ti ngemataka iya nerima perais mata duit RM3,000, trofi enggau selampai.
Penuduk lumur dua Ratu SNI dipenggi Elvinna Elder Brodi asal ari Miri sereta nerima perais mata duit RM2,000, trofi enggau selampai.
Lumur tiga Ratu SNI dipenggi Lydia Hyginius sereta nerima perais mata duit RM1,000 tofi sereta selampai.
Penerima perais pengaga ati pekit Ratu SNI nerima mata duit RM500 siku.
Ungkup penemu, bisi enam iku pemekit Keling SNI, lapan iku pemekit Kumang SNI enggau lapan iku pemekit SNI 2022.
Mensia mayuh ti deka meda baru Program Makai Malam Nutup Simposium Ngepan Iban (SNI) Renggat Nengeri Sarawak 2022 tu ulih ngerebak ke laman Facebook Datuk Dr. Penguang Manggil. – TVS
