MIRI, 11 Feb: Komuniti Iban di Sarawak diperansang ngena pekayan ti mandangka motif tauka chura ti ngundan identiti bansa Iban ninting Hari Satu.
Sapit Menteri Nembiak, Lumba enggau Pemansang Pedagang Sarawak, Dato Gerald Rentap Jabu madahka nya siti ari chara dikena ngangkatka pemanah ngepan tauka gari asal bansa Iban ti nyelai sereta patut dikemeranka.
“Kitai ulih ngena baju ti nguna motif kitai Iban sekalika maya gawa, tauka ngulu siti-siti pengerami baka kitai ke ngena baju batik ninting Hari Empat,” ku iya.
Iya mansutka jaku nya rambau dirandau pengarang berita TVS pengudah meri licha ngagai penyereta ke ngambi bagi dalam Simposium Ngepan Iban (SNI) Renggat Nengeri Sarawak 2022 ditu, pagi tadi.
Lebuh bekunsika penemu dalam simposium, iya madahka bansa Iban tau nguji ngena pekayan ti ngundan motif Iban ninting Hari Satu.
Iya nerangka pengawa nya mega ukai semina nunjukka pengangkun ngagai budaya Iban tang mega ulih mantu nyungkak ekonomi pedagang ti ngaga sereta nyual gari ke nguna chura gari asal Iban.
Rentap ke mega Kaban Kunsil Nengeri (ADUN) Layar madahka bansa Iban patut temegah ati ngembuan pesaka lama baka ngepan ti bisi marik empang tauka tangu, selampai, baju burung, labung, kain karap, marik manik sereta ke bukai ti semina dipenggi bansa Iban ba dunya tu.
“Nyadi nadai salah kitai ngena gari ke bisi mantaika motif tu. Ambika chunto bisi baju T Shirt ke dijual ngayanka bungai terung lalu kitai anang takut nguji laban nya mih identiti bansa, pesaka asal ke patut dipandangka ngagai orang bukai di serata dunya,” tandu iya.
Kelimpah ari nya, Rentap madahka orang ke diau ba rumah panjai ti landik betenunka pua kumbu,kain kebat, nusuk manik sereta ngaga krafjari anang enda ngambi peluang nyadi orang dagang awak ke ulih nambahka asil penatai pemisi nitihka singkang bansa bukai ti udah mujur dalam bidang dagang. – TVS
