MIRI, 11 Feb: Penembu begunan baru Gerija St Barnabas di Taman Tunku Miri ke udah disikap menyana dikearapka ulih meri pengelantang ngagai raban Kristian di mengeri tu besembiang seraya endur mantu orang tusah.
Ku Sapit Menteri Pengerai Mensia Mayuh, Pengawa Berumah enggau Kaunsil Kandang Menua Sarawak, Datuk Dr Penguang Manggil raban Kristian patut nguna palan nya enggau manah baka dikena ngatur program bekaul sereta mantu raban benung dituntung penusah.
“Aku pechaya bisi orang agi ngiga rumah endur sembiang, tang enda nemu ba dini tauka kini alai ti ulih dituju sida.
“Kita ulih mai sida ngagai gerija lebih agi enti orang nya benung tusah sereta begunaka bantu,” ku iya.
Dr. Penguang ke mega Kaban Kunsil Nengeri (ADUN) Marudi nerangka iya suah ngelalau orang ke bisi napi pemar, penusah sereta tusut runding mai diri ngagai gerija ngambi ke sida ulih besembiang, berunding manah sereta ngasaika pengelantang.
Iya mansutka jaku nya rambau ngarika Sapit Premier Sarawak, Datuk Amar Douglas Uggah Embas bejadika enggau merekat begunan baru Gerija St Barnabas di Taman Tunku Miri, ditu pagi tadi.
Nangkan ke nya, iya madahka projek nya tembu bulan Januari tu tadi nguna kos sepenyampau RM3.9 juta.
Bepelasarka rikod, projek nya nerima agih belanja ari sekeda pengari rayat ke bisi di mengeri Miri sepenyampau RM155,000, enggau ari Unit Pekara Pengarap Bukai (UNIFOR) sepenyampau RM2.9 juta sereta turu ke digumpul ari sekeda komuniti gerija sepenyampau RM421,957.
Sama bisi ngulu program nya Sapit Menteri Pengerai Malaysia, Lukanisman Awang Sauni, Sapit Menteri Dagang Temuai, Industri Kreatif enggau Seni Pemerindang, Datuk Sabastian Ting, Kaban Kunsil Nengeri (ADUN) Telang Usan, Dennis Ngau, Bishop Jagger Anglikan di Sarawak enggau Brunei Rt Reverend Datuk Danald Jute sereta temuai bukai. – TVS
