MIRI, 10 Feb: Komuniti Iban bela ngesan tangkup pengawa ngemeranka pemanah enggau penyelai ngepan Iban ti nyadi siti ari pesaka asal enda ngira siku-siku orang ke diau ba mengeri tauka menua pesisir.
Ku Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Datuk Dr Penguang Manggil, siti ari chara ke nemban dipejalaika iya nya ngatur Simposium Ngepan Iban (SNI) ti tau ngempuru raban tebangkar tauka pakar enggau mensia mayuh ti bisi penyiru enggau pengerindu negapka Ngepan Iban bekunsika penau, penemu sereta peneleba.
“Serak tu dalam Simposium Ngepan Iban Renggat Sarawak kitai ngangauka semua pakar ngepan Iban ari serata Sarawak bekunsika penemu senentang baka ni chara kitai ulih nyungkak sereta mai gari asal bansa kitai (Iban) dikelala ngagai tikas ke lebih tinggi,” ku iya.
Beduduk enggau nya, Dr Penguang ti mega Chairman Komiti SNI Renggat Nengeri Sarawak 2022 nerang penemu ke diterima penyereta ke ngambi bagi dalam simposium nya tau dikunsi enggau dikerembaika ngagai nembiak rebak baru.
“Rambai jaku SNI serak tu iya nya Ngepan Pesaka Bansa, Nyungkak Pemansang Ekonomi Bansa Iban endang senutuk enggau gaya pemansang kemaya hari sereta nentuka bansa kitai dikelala orang di serata dunya,” tandu iya.
Iya mansutka jaku nya rambau bejadika Simposium Ngepan Iban (SNI) Renggat Nengeri Sarawak 2022 ba sebuah hotel tebilang ditu, pagi tadi.
Udah nya, Dr Penguang madah, SNI mega nerima sukung ari perintah Sarawak ke diiring Premier Sarawak, Datuk Patinggi Tan Sri Abang Johari Tun Openg ti mandangka perintah nengeri ngemeratka pemanah seni, main asal sereta pesaka asal semua komuniti di kandang menua tu.
Lebih 300 iku penyereta ke ngambi bagi dalam SNI Renggat Nengeri Sarawak 2022 ke nyerangkung tuai raban bansa, pengemeran seni, raban akademik, Gerempung Ukai Dikuasa Perintah (NGO) sereta siku-siku orang ti rinduka Ngepan Iban.
Entara pejuluk ti deka dipejurai ba hari keterubah SNI tu iya nya Ngepan Asal Iban, Tenun Karap, Anyam enggau Sungkit Dalam Variasi Bengepan.
Nangkan ke nya, pejuluk ti deka dikunsi iya nya Ngepan Iban nyungkak pemansang ekonomi enggau kostum kontemporari enggau fesyen gaya Iban.
Ke penerang mensia mayuh simposium tu mega bisi dipancharka terus nengah laman Facebook Datuk Dr Penguang Manggil ungkup sida ti deka nemu entara pekara ke dikunsi pengelama dua hari SNI nya.-TVS
