KUCHING, 10 Feb: Pengawa meri basa ke udah dipandangka perintah nengeri ngagai raban atlit ke udah teulihka pemujur ba pengawa lumba dipuji.
Sekeda raban atlit ke bisi dirandau pemberita madah diri deka ransing agi ngulihka pemujur ungkup sarawak dudi hari.
Atlit Tinju Kaunsil Lumba Menua (MSN), Daeloniel Mcdelon Bong tauka Kilat Boy meri terima kasih besai nuju Perintah Nengeri sereta semua raban bekaul laban udah ngingat lalu meri insentif nyadika peransang raban atlit nengeri tu.
Keterubah aku deka meri terima kasih ngagai Perintah Nengeri Sarawak, MSN, SFC, gerempung enggau mega semua jurulatih lebih agi Perintah Nengeri Sarawak.
“Terima kasih mayuh ke insentif enggau basa ke udah diberi ngagai semua atlit ke udah mujur lalu tu deka meri peransang ngagai semua kami bebendar agi nyapi pemujur ngarika menua enggau Sarawak sereta meri asil ke lebih manah,” ku iya.
Udah nya, Atlit Boling Sarawak Nur Hazirah Ramli mega meri terima kasih ngagai Tuhan lalu aku deka meri terima kasih mega ngagai perintah laban meri peransang ngagai atlit Sarawak.
Iya madah diri chukup gaga sereta berasai temegah nyadi anak Sarawak.
Pia mega, Atlit Tenis Sarawak, Muhammad Aiman Hamdan mega enda tinggal madah pengaga ati diri pengudah nerima insentif nya.
Ku iya, insentif nya mai reti perintah Sarawak ingatka pengawa kami maya belatih lalu lebuh nerima insentif tu berasai amat beterima kasih.
Semua sida mansutka penemu nya maya pengerami nyuaka Insentif SUKMA XX, MSN 2022, Lumba Sea 2021, Lumba Komanwel 2022 enggau Lumba Para Asean 2022 ditu, kemari.
Berebak enggau nya, maya ditanya senentang gerah ari Premier Sarawak Datuk Patinggi Tan Sri Abang Johari Tun Openg bekaul Sarawak sedia nyadi palan endur ngatur lumba Malaysia Sukma 2024, tebal agi raban atlit bela setuju sereta nyukung perambu nya.
Ku Aiman, iya berasai berasai gagit mih nyema Sarawak nyadi tuai rumah Sukma, lalu kitai deka ngaga enggau naka ulih ungkup Sarawak enggau nyapai saran laban Sukma semak ba Sarawak.
“Nya alai, kitai (Sarawak) enda tau alah,” ku iya.
Udah nya, Hazirah madah diri berasai chukup gaga laban enti Sarawak ulih nyadi tuai rumah dia sida ke belatih deka lebih mudah laban semak enggau menua diri.-TVS
