MIRI, 10 Feb: Gerempung Ukai Dikuasa Perintah (NGO) Iban diperansang terus begempung enggau saum runding dalam ngemansangka Ngepan Iban lebih agi betapi enggau segang dunya moden enggau teknologi kemaya hari.
Chairman Kelab Ngepan Iban Betong (KNB) Sigat Sang madahka, endang chukup beguna semua NGO di serata Sarawak ke bisi pengerindu ngetan enggau nyungkak Ngepan Iban begempung awak ke jaku, langgur penemu sida dititihka mensia mayuh kelimpah ari sada sida nyarih didinga perintah enggau ejensi ke bekaul.
“Enti semua NGO begempung bela bejalaika tangkup pengawa diri tetiap bengkah penerang ke dikunsika sida deka dimalin enggau dititihka bansa Iban, lebih agi bekaul enggau ngepan,” ku iya madah.
Sigat nerangka, kaul ti manah entara NGO enggau perintah ulih ngemudahka enggau ngelancharka program diatur nyengkaum lebuh minta turu tauka agih belanja dikena ngatur sesebengkah program ti tau meri empas ke positif ngagai komuniti Iban.
“Sukung ari perintah Sarawak ba pengawa ngetanka pesaka asal kitai Iban ngelama tu sigi manah lebih agi maya kitai minta belanja dikena ngatur program,” tandu iya.
Iya mansutka jaku nya rambau dirandau pengarang berita TVS beserimbai enggau Simposium Ngepan Iban (SNI) Renggat Nengeri Sarawak 2022 ba sebuah hotel tebilang ditu, tadi.
Udah nya, ba penemu Chairman Sarakup Indu Dayak Sarawak (SIDS) Pampang Niah Midamcory Jepang madahka, penyereta SNI nya ulih nambahka pemereti senentang sejarah Ngepan Iban sereta patut dikerembaika agi ukai semina dalam komuniti Iban tang ngaul komuniti bukai.
“Nya alai, enda ngira renggat umur semua orang ke bisi penyiru enggau pengerindu ngetanka Ngepan Iban sigi diperansang ngulu simposium tauka program bukai ti mandangka seni enggau pesaka asal bansa kitai,” ku iya madah.
Iya nerangka, mayuh nembiak rebak baru pabu penemu senentang guna Ngepan Iban lalu SNI siti pelantar ke nemban alai sida ninga, meda seraya belajar ke Ngepan Iban nyengkaum nembiak ke bisi pengingin ati deka bepekit.
“Nembiak rebak baru diperansang ngulu program baka tu ngambi ke sida nemu entara pekara ke patut enggau enda lebuh bengepan laban udah diterang senentang chara ke betul,” ku iya nyemetak. – TVS
