MIRI, 5 Feb: Empat iku orang berikan mujur diselamat lebuh sida anyut sereta semina bepaut ba siti tong ikan urung 75 batu nautika penyauh ari Muara Sungai Miri pengudah bot ditepan sida karam dipangka gelumbang ditu, pagi kemari.
Direktor Zon Maritim Miri, Kapten Maritim, Mohd Shafie Paing madah, semua sida tu beumur entara 25 ngagai 44 taun ditemu kapal Ultra Jaya pukul 10 pagi sebedau sida dibai nepan KM Tabah nuju ke jelatung Marina Bay ditu.
“Semua sida udah nya dibai nepan Bot Kilat APMM nuju jelatung Marina Bay sereta nerima perubat ari raban Opis Pengerai Malaysia (KKM),” ku iya nengah sebengkah penerang media, sehari tu.
Ku iya, semua sida dipeda chukup ikak laban aus lalu udah dianjung ngagai Sepital Miri ungkup atur bekaul.
“Bepelasarka penerang, sida nurun ngini kenyau 29 Januari ke udah. Bot ke dikena sida nginti karam pengudah dipangka gelumbang tumu pagi 30 Januari,” ku iya.
Iya madah, Maritim Malaysia ngelalau komuniti maritim patut nentuka pendiau bot seruran manah enggau patut nginsil pejalai ke tasik nyema gaya hari enda manah.
Enti nyema enda ulih enda nurun ke tasik, Maritim Malaysia ngelalau mensia mayuh seruran ngena jaket pengelikun enggau mai kereban Personel Located Beacon (PLB) dikena ngemuntangka raban penyah penusah nyidi endur penusah nyadi. -TVS
